Qartlıq buyınça pensiägä çığuçılar respublikada kimi ikän. Çönki alar pensiä yäşenä qädär yäşäp citkermi. Ayıruça irlär. Bu turıda pensiä fondınıñ utırışında äytelde. Qartlıq buyınça pensiägä çığuçılar kimesä, anıñ qarawı invalidlıq buyınça pensiä aluçılar soñğı 4 yılda beremä-ber artqan.
Ğomumän äytkändä 2005 yılnı barlığı 62 meñnän artıq keşegä pensiä bilgelängän. Rusiäneñ Tatarstandağı pensiä fondı bülege citäkçese Ayrat Şäfıyğullin rayon-şähärdäge pensiä idäräläre eşçänlegenä tuqtaldı. Yaña bilgelängän citäkçelär belän tanıştırdı. Şulay uq yaxşı eşlägän idärälär ataldı. Qayberlärenä şeltä dä belderelde.
Pensionerlarğa tülänä torğan aqça aşasañ kienergä, kiensäñ toraq öçen tülärgä citmi. Utırışta Tatarstan Profsoyuzları Federatsiäse citäkçese Tata'yana Vodop'yanova 46 protsent pensioner yäşäw öçen kiräk bulğan aqçadan azraq pensiä aluın, yäğni xäyerçelek rätendä buluların äytte. Şul säbäple, soñğı waqıtta pensiägä çıqqaç ta yal itärgä aşıqmıyça - eşlärgä mäcbür buluçılar ike tapqırğa artqan. Barlıq pensionerlarnıñ 20 protsenttan artığı, şul 2 meñne tartıp-suzıp yäşämäs öçen eşli ikän bügenge köndä. Bu äle Tatarstanda. Ä başqa töbäklärdä xällär tağın da möşkelleräk bulsa kiräk. Çönki utırışta İdel buyı federal' okrugı arasında pensiä tüläw buyınça Tatarstanda iñ yuğarı kürsätkeçlär dielde.
Utırışta oyışmalardan Pensiä fondına küçerelä torğan aqça mäs’äläsenä dä tuqtaldılar. Bu xaqta TR Premyer-ministrı Röstäm Miñnexanov
Oyışmalar belän söyläşü kiräk. Pensiägä çığuçılarnıñ xezmät xaqların arttıru, aqçalarnı waqıtında pension fondqa cibärü zarur.
Pensiä fondına küçüçe aqça mäs’äläse tübän xezmät xaqı alıp eşläwçelärne ayıruça borçıy. 2 meñ yarımğa eşläsäñ, 3 yıl digändä dä barı 70 sum tiräse genä aqça cıyıla ikän. Ä awıl cirendä xalıqnıñ küpçelege ayına 2-3 meñ sum ğına xezmät xaqı alıp eşläwe mäğlüm.
Bua şähäre pension fondı idäräse citäkçese Rafiq Cälälov az aluçılar öçen pensiä bilgeläuneñ başqa ısulların tabarğa kiräk dip bilgeläde.
Röstäm Miñnexanov kiläçäktä pensionerlar öçen sotsial' qartalar eşlänäçägen assızıqladı. Älege proyekt bügenge köndä respublika Xökümätendä uylanıla ikän.
Landış Xarrasova
