Accessibility links

шимбә, 10 декабрь 2016, Казан вакыты 13:45

Miloşeviç cäsäde Belgradqa qaytarıldı


Çärşämbedä Yugoslaviäneñ elekke citäkçese Slobadan Miloşeviçnıñ cäsäde Nederlandtan Belgradqa kiterelde. Şulay itep, suğış cinäyätlärendä ğäyeplänep, 5 yılğa yaqın Haag mäxkämäsendä ütkärgän Miloşeviç ilenä tabutta qayttı.

Äytergä kiräk, mondıy näticäne - Miloşeviçnı "Balkan itçese" - "üterüçe" dip atağan qorbannarı da, anı ğäyepsez dip sanağan tarafdarları da – telämäde. Quşma Ştatlarnıñ elekke prezidentı Bill Clinton üzeneñ xislären bolay añlattı: "Miloşeviçnıñ ğäyebe raslanmıy torıp, mäxkämä betkänçe ülep kitüe anıñ üze öçen dä, bar Balkan öçen yaxşı närsä tügel."

Serbiäneñ Sotsialistlar partiäsennän kilgän, ämmä raslanmağan xäbärlärgä qarağanda, Miloşeviç şimbä könne tuğan şähäre Pozarevacta cirlänäçäk. Xuşlaşu möräsime partiäneñ Belgradtağı binasında ütäçäk.

Serbiä prezidentı Boris Tadiç däwlät däräcäsendä cenaza ütkärügä qatğıy räweştä qarşı çıqtı. Ammä Miloşeviçnıñ ğailäse cenazanı xoususıy räweştä ütkärergä irekle, dide ul.

Bu qararnı uzğan töndä Serbiä premier-minsitrı Vojislav Kostunica da rasladı. Küzätüçelär fikerençä, Kostunica, Miloşeviç cenazasın Serbiädä ütkärügä röxsät birep, xökümättäge zäğif totrıqlılıqnı saqlap qalırğa teli. Sotsialistlar qarşı çıqsa, xökümät taralıp yaña saylawlarğa kiterergä mömkin.

Miloşeviçnıñ cäsäden Belgradqa anıñ ulı Marko alıp qayttı. Xatını Mira Markoviç ireneñ cenazasına qaytırmı-yuqmı - älegä bilgesez. Ul da watanında berniçä cinäyättä ğäyeplänä, 2003 yıldan birle Mäskäwdä yäşi. Sişämbedä Belgrad mäkmäse, aña cenazada qatnaşu mömkinlege birü öçen, anı qulğa alu qararın, waqıtlıça köçtän çığardı. Ämmä qaytqan oçraqta, pasportın tapşırırğa häm cenaza betkännän soñ soraw aluğa kilergä quştı.

Ul arada, Miloşeviç ülemenä bäyle qarşılıqlı belderülär yasala tora. Mäskäwdäge Yöräk däwalaw üzäge citäkçese Leo Bokeria, Haagqa barıp, yaru näticälären kürgännän soñ, Holland tabiplarınıñ, Miloşeviç yöräk öyänägennän wafat bulğan digän näticäse belän kileşte. Şul uq waqıtta ul, Miloşeviç tieşle däwalaw alğan bulsa, ülmägän bulır ide dide. "Bez berqayçan da anıñ Mäskäwgä kilüen taläp itmädek. Bez barı tik, aña tieşle däwalaw kürsätelmi didek. Kürsätelgän bulsa, ul äle dä isän bulır ide", di Rusiä tabibı.

Miloşeviç yuğarı qan basımınnan daru alğan, ixtimal şunıñ yan täesire bulğan digän xäbärlär, älegä raslanmadı. Toksikologiä näticäläre älegä äzer tügel. Serbiä häm Çernogoriäneñ saqlanu ministrı Zoran Stankoviç radiobızğa äytüençä, cawapsız sorawlar äle şaqtıy. "Bar tikşerülär, tieşle dokumentlar tuplanğaç qına - üler aldınnan ul nindi darulär eçkän, tabiplar yä törmä saqçılarınıñ xatası bulğanmı, yä isä berkemneñ dä xatası bulmağanmı – şuşı sorawlarğa cawaplar birelgäç kenä, bu mäsälä yabıq dip äytep bulaçaq", dide ul.

Ali Gilmi
XS
SM
MD
LG