Accessibility links

якшәмбе, 4 декабрь 2016, Казан вакыты 01:01

Açıq mikrofon: Sez nindi su eçäsez?


Yaz, cılı kilü östämä mäşäqät tä östi. Nik disäñ, bıyılğı qış bik salqın ğına tügel, qarlı, buranlı da buldı. Şuña da, alda bezne yazğı taşu, su basular kötä. Sinoptiklar farazları buyınça, barlıq yılğalar da diärlek yarlarınnan taşıp çığaçaq. Su basularnıñ iñ köçlese Tön'yaq Kavkazda, Kalmıkiädä, Stavropol', Krasnodar, Kaliningrad ölkälärendä kötelä. Tatarstannı da taşu çitläp ütmäyäçäk.

Yazğı taşular, eregän qar suları su basularğa kiterüdän tış, tağın ber problema da tudıra. Fatirdağı krannardan ağa torğan bolay da bik ük çista tügel su, yazğı aylarda tağı da äşäkelänä, zararlı matdälärneñ sanı häm küläme arta. Bu da yaz könnärendä keşelärne borçıy torğan ber bik möhim mäs’älä. Şuña da, bügenge Xalıq awazı rubrikasında bez qazanlılardan: “Sez nindi su eçäsez”, dip soraştıq:

Bez kran suın eçmibez. Ä maxsus şeşälärdäge maxsus sunı qaytartabız. Çönki kran suı tämsez, xlorlı häm döres çistartılmıy dip uylıym min.

Krannarda su bik naçar, bez su çistartqıçların qullanğan idek tä, läkin alarnıñ faydasın min kürmim. Häm şunlıqtan başta sunı qaynatam, ä annarı berniçä qat mar'lya aşa çığaram. Ä kibettän su satıp ala başlasaq, aqça citkerep bulmayaçaq.

İnde berniçä yıl däwamında bez maxsus su çistartu qullanmasın faydalanabız. Ul bik yaxşı çistarta. Ä bolay eçep qarasañ kran suınıñ üzlekläre bik naçar.

Krannan su eçkänem yuq, kiräk bulsa bez qaynatıp eçäbez. Su bik pıçraq bulğanlıqtan, ul sälämätlekkä bik nıq zıyan kiterä.

Min kran suı belän qänäğät tügel, şuña kürä min fil'tr belän qullanam, krannan su berqayçan da eçmim.

Bez Qazan keşeläre tügel. Bilgele awıldan kilep mondağı sunı eçep bulmıy. İäläşüe bik awır bulğanlıqtan, kibettän mineral' sular alıp eçäbez.

Bez kran suın eçkän yuq. Ul xäzer bötenläy yanına kilep bulmıy. Sası, pıçraq, xlorlı.

Gölnaz Şäyxetdin

XS
SM
MD
LG