Accessibility links

шимбә, 3 декабрь 2016, Казан вакыты 14:50

Milli kitap çığaru – aqça sarıf itüme?


Qazan gäzitläreneñ berse, xisap palatasınıñ tikşerü näticälären bastırıp çığardı bu könnärdä. Gäzit yazğança, «Tatmedia» agentlığında aqçalarnıñ näticäle totılmawı açıqlanğan. Yäğni ağetnlıq 61,8 million sum budjet aqçasın sarıf itkän. Bu aqçalar satılmağan kitaplarnı çığaruğa häm nigezdä tatar gäzitläreneñ çığımnarın qaplawğa totılağan, dip xäbär itelde. Xisap palatasınıñ mäğlümatların «Veçernyaya Kazan» gäzite bastırıp çığardı. Bu basma, Tatarstan, mäğlümat çaralarınıñ sanı yağınnan Rusiädä berençe urında tora, ämma monnan ni fayda, digän soraw quya. Mäqälädä, tikşerüçelär xisabınnan ber özek kiterelä. «Sotsial yaqtan möhim ädäbiät bastıru külämnäre yıldan yıl artıp barğanda, anıñ küp öleşe Tatarstan kitap näşriäteneñ häm «Mäğärif» milli kitap näşriäteneñ skladlarında yartı millionğa yaqın nösxä ciyılıp yata, dielä älege gäzit mäqäläsendä. Gäzit yazğança, anda 30 million sumlıq towar yata ikän. Yazmada, sotsial yaqtan möhim kitaplar, ä ul däresleklär, şiğer, çäçmä äsärlär cıyıntıqları, satılmıy torğan towar, nelekvid, dip atala.

«Mäğärif» näşriäte citäkçese, Mödäris Wäliev, älege yazmanı uqıp, anda kiterelgän qayber sannarnı kire qağarğa buldı. Menä anıñ süzläre: «Monda başqa näşriätlär çığarğan kitaplarnı quşıp, ber yulı zurraq san yasarğa tırışqannar. Anda «Mäğärif» näşriäteneñ kitapları- mäqälädä kürsätelgän sannıñ altıdan ber öleşe genä. Kitaplar skladta bulırğa tieş. Mäktäplär açıla tora, däresleklärgä zakazlar kilep tora, kiräk bulğanda, 100-200läp tabıp utıra almıybız. Bu bezneñ strategik zapas

Mödäris Wäliev birgän mäğlümatlarğa qarağanda, xäzerge waqıtta, saqlaw urınında «Mäğärif» näşriäte çığarğan 190 meñ yağın nösxädä milli däreslek, başqa kitap bar. Aları da, «Tatarstan kitap närşiäte»neñ skladlarında saqlana, di Mödäris Wäliev. Şulay itep, näşriät citäkçese, kitaplarnıñ cıyılıp toruın tanıy, ämma bu normal äyber dip bara. Mäqälädä şulay uq, älege däresleklär, milli ädäbiät, üzqimmätennän arzanraq bäyägä satıla, dip äytelä. Mödäris Wäliev, moña bolay cawap birä: «Kitaplarıbız, mäktäpne, balalarnı däreslekle itü öçen çığarıla. Alar xalıqqa, däwlät yärdäme belän, arzanraq bäyägä sata ikän, min monda ber nindi cinayät kürmim» «Mäğärif» näşriäte başlığı üze citäklägän oyışma öçen cawap birde. «Tatarstan kitap näşriäte» belän elemtägä kerep bulmadı. «Veçernyaya Kazan» gäziteneñ mäqäläsendä şulay uq, «Tatmedia » agentlığı sarıf itkän 61 million sum däwlät gäzitläreneñ çığımnarın qaplawdan ciyılğan, dip xäbär itelä. Andıy basmalar rätendä, «Sabantuy», «Molodej Tatarstana», «Mädäni comğa» gäzitläre, «Miras» jurnalları atala. Gäzittä, «Tatmedia» däwlät aqçaların sarıf itüdä ğäyıplänä, ämma däwlät mäğlümat çaraların bağuçı bu ağentlıq, açıq räweştä, bu gäzit mäkäläsenä ber nindi reaksiä kürsätmäde.

Bikä Timerova

XS
SM
MD
LG