Accessibility links

пәнҗешәмбе, 8 декабрь 2016, Казан вакыты 05:07

“Premyer-ministr” tatarça cır öyrängän


“Cide yoldız” festivalendä barlığı 23 çığış qaralğan. Çığış yasawçılar arasınnan matbuğat oçraşuında Qırımnan kilgän virtuoz gitaraçı Änwär İzmaylov, Sankt-Peterburgtan opera cırların başqaruçı Äxmät Ağadi, şulay uq Latviädän Elina Şihabetdinova häm Mäskäwdän “Premyer-ministr” törkeme qatnaştı.

Dön'yaküläm bilgele gitaraçı qırım-tatarı Änwär İzmaylovnıñ soñğı waqıtta Qazanğa säfäre yışaydı. Ğomumän ul kübräk çit illärdä, Yevropada çığış yasıy. Tatar muzıkasın çit illärdä niçek qabul itälär dip qızıqsındı jurnalistlar. Sıyfatlı, yaxşı itep uynasañ çit il xalqınıñ qırım-tatar köylären bik yaratıp tıñlawların äytte ul.

Änwär İzmaylovqa quşılıp Latviädä klassik cırlar başqaruçı Elina Şihabetdinova Rigada tatar cırları notaların annan yış sorıylar dip belderde.

Änwär İzmaylov küptän tügel genä N'yu-Yorkta yäşäwçe millättäşlärebezgä konsert quyıp qaytqan.

Qazanğa baram digäç millättäşlärgä sälam äytergä quştılar. Küzlärendä moñsulıq sizelde.

Festival'dä kübräk zamança cırlar yañğırayaçaq dip küzallansa da, Elina Şihabetdinova Klyuçarev, Yäxin romansların, Äxmät Agadi Näcip Cihanovnıñ “Altınçäç” operasınnan özek başqaraçaq. Änwär İzmaylov “Bas qız qızım Äpipä”ne uynayaçaq ikän. Ämma iñ

ğäcäpländergäne “Premyer-ministr” törkemeneñ tatarça cırlawı. Alar festival'dä “Ay bılı-bılı” xalıq cırın başqaraçaqlar.

Zamana yäşläre şaqtıy üz itkän “Premyer-ministr” törkemendä Marat Çanıyşev digän tatar yegete dä bar. Küp kenä başqa cırçılardan ayırmalı bularaq Marat üzeneñ tatarça yaxşı belüen äytte. Xätta cırlap ta kürsätte

“Premyer-ministr” törkeme küp millätle dip äytep bula. Anda tığın çegän yegete dä bar. Kiläçäktä “Premyer-ministr” törle milli konsertlar oyıştırırğa uylıylar ikän.

Qazanda yış bulu säbäple inde tatarlar turında küp beläbez dide Premyer-ministrlılar. Öygä qaytqan kebek qaytabız Qazanğa didelär.

Çittän kilgän cırçılarnıñ barısı da kilgän sayın Qazannan çäk-çäk alıp kitülären äyttelär. Qazanda ğına şundıy tämle çäk-çäk peşerälär didelär.

Landış Xarrasova

XS
SM
MD
LG