Accessibility links

җомга, 9 декабрь 2016, Казан вакыты 22:19

Yunıs Kamaletdinov: Bez ğayepsez möselmannarnı yaqlap çıqtıq


Bögelmädä terakt oyıştıruda ğayıplänüçe öç möselman xaqında uzğan tapşırularıbızda söyläp kildek, xörmätle tıñlawçılar. İskä töşerep ütäbez, Fänis Şäyxetdinov, Timur İşmoratov häm Rawil Gomärov uzğan yılnıñ berençe ğinwarında Bögelmä şähärendä gaz torbasın şartlatuda ğayıplände. Ämma belgeçlär monı texnik avariä dip sanıy. Uzğan yılnıñ sentäber ayında “Bögelmä eşe” mäxkämädä qaraldı. Prisyajnıylar mäxkämäse möselmannarnı ğayıpsez dip taptı. Häm alar irekkä çığarıldı. Tatarstan prokuraturası isä qarşılıq belderde häm Mäskäwdä Yuğarı mäxkämäneñ qaraşı belän bögelmälär yañadan qulğa alındı.

Comğa irtäsendä milli xäräkät wäkilläre Tatarstan prokuraturasınıñ ğämällärenä qarşı piket oyıştırdı. Milli xäräkät wäkilläre bu ğämällär möselmannarğa, tatarlarğa qarşı maxsus eşlänä dip sanıy. Bötentatar ictimaği üzägeneñ ber qanatı räise Yunıs Kamaletdinov söyli:

Bu inde sistemağa kerep bara. Yıl yarım waqıt däwamında Räfis Kaşapovnı borçıdılar, törle törmälärdä yörttelär. Monı prokuratura eşläde. Annarı Älmättäge dürt möselman belän dä şulay buldı, axırda barıber çığarırğa mäcbür buldılar. Menä xäzer bögelmälär eşe. Bez monı döres dip tapmıybız. Häm möselmannarnı yaqlap, prokuraturağa qarşı çıqtıq. Piketqa törle mäğlümat çaraları kilde. Xalıq bu ğämälne ähämiätle dip taptı. Kiläçäktä dä ğayıpsezlärne yaqlap, qarşılıq belderäçäkbez.

Respublikanıñ prokuratura wäkilläre isä milli xäräkät wäkilläreneñ ğayıpläwlären nigezsez dip sanıy. Tatarstan prokurorınıñ massaküläm mäğlümat çaraları belän eşläw buyınça yärdämçese İldar Möxämmätcanov söyli:

Bu yalğış fiker. Keşelärne din häm başqa mäs'älä buyınça ezärlekläwgä Tatarstan prokuraturasınıñ häm şulay uq respublikanıñ Yuğarı mäxkämäseneñ dä bernindi qatnaşı yuq. Äye çınlap ta Fänis Şäyxetdinov, Timur İşmoratov häm Rawil Gomärovnı mäxkämä ğayıpsez dip taptı. Tatarstan prokuraturası isä mäxkämä eşe döres alıp barılmadı dip sanap, bu xaqta Rusiäneñ yuğarı mäxkämäsenä citkerde. Rusiäneñ yuğarı mäxkämäse mäxkämä qararın ğämäldän çığardı häm Tatarstanğa älege eşne yañadan tikşerü öçen cibärde. Bu alarnı ğayıpläw yäki ğayıplämäw maqsatınnan eşlänmi, çönki mäxkämäneñ berençe qararı qabul itelgändä qanun häm qağidälärne bozu oçraqları buldı.

Al'bina Zäynulla

XS
SM
MD
LG