Accessibility links

сишәмбе, 6 декабрь 2016, Казан вакыты 21:02

Mixail Şvıydkoy Ufada eş säfärendä


Rusiäneñ Mädäniät häm kinematografiä buyınça federal'' agentlığı başlığı Mixail Şvıydkoynıñ atnakiç könne Başqortstanğa eş säfäre belän kilüe xaqında xäbär itkän idek inde. Bıyıl sentäber ayında Başqortstanda törki telle illär teatrlarınıñ “Tuğanlıq” dip isemlängän IV xalıqara festivale ütäçäk. Mixail Şvıydkoy, menä şul festival''lgä äzerlek barışın tikşeräçäk kiñäşmädä qatnaşu öçen, Ufağa kilde.



Älbättä, Mixail Şvıydkoynıñ Başqortstanğa eş säfäre programması şul kiñäşmädä qatnaşu belän genä çiklänmi. Comğa könne Mädäniät häm kinematografiä federal'' agentlığı citäkçese Ufadağı baytaq qına mädäni oyışmalarda, teatrlarda da buldı häm alarnıñ eşçänlege belän yaqınnan tanıştı. İrtänge yaqlarda uq Mixail Şvıydkoynı Ufa däwlät sänğät akademiäse, Ufa urta maxsus muzıka mäktäbe, Başqortstan däwlät opera häm balet teatrı eşçänlekläre belän tanıştırdılar.

Başqortstan däwlät opera häm balet teatrına kergänçe, Mäskäw qunağı şuşı teatr diwarında kürenekle balet biüçese Rudol''f Nurievqa quyılğan istälek taqtası qarşına çäçäklär saldı.

Töş waqıtında Mixail Şvıydkoy Respubliqa yortında prezident Mortaza Räximov belän oçraşıp söyläşte. Anda mädäniätkä qağılışlı törle mäs''älälär belän bergä törki teatrlarnıñ bıyılğı “Tuğanlıq” xalıqara bäyrämen oyıştıru mäs’äläläre dä tikşerelde. Kiläçäktä şuşı festival''ne älege kebek dürt yılğa ber tapqır ğına tügel, ä ike yıl sayın ütkärü kiräklegen äytte Mixail Şvıydkoy. Mortaza Räximov älege täqdimne xuplawın äytte häm anı oyıştıruğa härtörle yärdäm kürsäteläçägen dä ışandırdı.

Mixail Şvıydkoy da üz çiratında federal'' üzäktän Başqortstandağı qayber mädäni proyektlarnı tormışqa aşıru öçen finanslar bülenäçägen ışandırdı. Misal öçen, Ufa däwlät sänğat akademiäse eşçänlege belän tanışqaç ta ul törle muzıka qoralları aluğa häm akademiäneñ binasın tözekländerügä aqça bireläçägen äytte. “Eş kürsätkän mädäni üzäklärgä yärdäm itäse kilep tora”, - di Mixail Şvıydkoy.

Mädäniät häm kinematografiä federal'' agentlığı başlığı Mixail Şvıydkoy Ufada töştän soñ törki telle illär teatrlarınıñ “Tuğanlıq” festivalen oyıştıru komitetınıñ berençe utırışında qatnaştı häm anda çığış yasap, üzeneñ qayber täqdimnären dä yañğırattı. Teatrlarnıñ xalıqara “Tuğanlıq” bäyräme sentäber ayında Ufada ütäçäk.

XS
SM
MD
LG