Accessibility links

якшәмбе, 11 декабрь 2016, Казан вакыты 13:08

Omskida Renat İbrahimov konsertı ütte


Sişämbe könne Omski ölkä filarmoniäseneñ konsertlar zalında Rusiäneñ häm Tatarstannıñ xalıq artistı Renat İbrahimov konsertı bulıp uzdı. Omskiğa qadär cırçı Çiläbe häm Tömän şähärlärendä çığışlar yasadı.

Äytergä kiräk, Omski tamaşaçısı belän Renat İbrahimov 25 yıl ütkännän soñ oçraştı. Ul waqıtta şığrım tulı zallarda anıñ berniçä konsertı bulğan ide. Xäzer isä ber genä konsert buluğa qaramastan, zalda buş urınnar şaqtıy ide. Ä inde kilüçelärne artistnıñ talantı aldında baş iyülçelär dip äytü yalğış bulmas. Başqarılğan här cır köçle alqışlarğa kümelde. Konsert barışında cırçı zamana köyläre, rus xalıq cırları, ariälär, ital'yan, ingliz tellärendä cırlar başqardı. Anıñ repertuarında tatar cırları da buldı.

Konsert tammalanğannan soñ min tatar millätennän bulğan berniçä tamaşaçınıñ fikere belän qızıqsındım. Oçratqan berençe tamaşaçım qanunnar çığaru cıyılışı deputatı Ravil' äfände Bikbavov buldı.

Konserttan soñ matbuğat oçraşuı oyıştırıldı, Renat İbrahimov anda Omski jurnalistların qızıqsındırğan sorawlarğa cawaplar birde. “Azatlıq” tıñlawçılarına Renat äfände, tatarlarğa kübräk mäğrifät buyınça tırışırğa kiräk digän telägen belderde.

Menä şulay, Omski tamaşaçısı ozaq yıllar ütkännän soñ qabat yaratqan cırçısı belän oçraştı. Tatar sänğäten söyüçelärgä tizdän tanılğan cırçılar belän oçraşu mömkinlege bulaçaq. Aprel' ayında zur konsert programması belän Omskiğa Tatarstannıñ atqazanğan artistı Zaqir Şahban citäkçelegendä ber törkem artistlar kilüe kötelä.

Rozaliä Sayganova, Omski

XS
SM
MD
LG