Accessibility links

шимбә, 3 декабрь 2016, Казан вакыты 20:48

Samarda “Aq bäxet” ofığın kiñäytä


Samarda tatar telendäge radiotapşırularnıñ taw başı 1992-2002 yıllarğa turı kilä. Bu unyıllıqta atnasına tuğızar säğätlek “Aq bäxet” isemle radiotapşırular yañğırap tordı. Ä menä 2002 yıldan soñ aqsıy-tuqsıy ölkä radioqanalında atnasına tügel ayına 10-15 minutlıq qıramağa qaytıp qaldı. Açıqtan-açıq tatarlarnı qıstılar, xättä Rusiäneñ töp xalqı itep tä qaramıy idelär, çın mäğnäsendä kilmeşäklär belän söyläşkändäy tottılar radioçinovniklar. Ölkä radiosında inde yartı yıldan artıq tatar awazına urın yuq, etlär, mäçelär, salat yasaw, käbestä tozlaw turında söyläsälär söylilär, tik menä tatar süze genä işetelmäsen, tatar cırı ğına yañğıramasın.

Samarda “21 ğasır” isemle bäysez radiostansiä dulqınında atnasına ike kön - pänceşämbe häm şimbä könnärendä utızar minut “Aq bäxet” yañğırap kilde. Nihäyät Samarda “Aq bäxet” üzeneñ ofığın kiñäytep cibärde.

“Aq bäxet” tapşıruların alıp baruçı Nailä xanım Sabircanowa belän äñgämä:

- Nailä xanım, Sezneñ “Azatlıq” radiosı dulqınına çığuığız härwaqıt yä xäsrätle xäbär, yä quanıçlı xäbär belän genä bäylängän. Bu yulı qaysısına tuqtalasız? - Quanıçlısına! Bik- bik ozaq waqıtlar “Tuğan tel” cämğıyate häm Samar şähär tatar milli- mädäni möxtäriäte “Aq bäxet” tapşıruların arttıru yünäleşendä tırışlıq kürsättelär. Samar möxtäriät citäkçese Cämil äfände Wäliullin “21 ğasır” radiosınıñ xucası Gennadiy Zvyäginğa küp märtäbälär möräcägät itep, ütenep- yalwarıp, köçkä- köçkä atnasına ike säğätlek efir waqıtı ala aldı. - Bu setqa niçek bulır? Format üzgäräme? - Tapşırular şul uq könnärdä saqlana. Başı da şulay uq. Tik menä yartı säğätkä ozaytıla ğına. Atna kiç 20 säğättän 21 säğätkä qädär häm şimbä kön 14 säğättän 15 säğätkä qädär. Elek şaw mäğlumattan torsa, xäznr muzıykağa urın kübräk bireläçäk. Bezneñ Samar tatarların “Aq bäxet”neñ elekkege altışar säğätlek tapşıruları “bozıp” beterde, “bozıp” süze yaxşı mäğnädä. Alar räxätlänep, cäyelep aşarğa peşerä- peşerä, baqça eşli- eşli tıñlıylar ide. Cäy könnärendä daçalarda şaw tatar tapşıruların işetä idem. Bezneñ tatar tıñlawçısına qısqa tapşırular oşamıy, aña bulsa bulsın ozın tpşıru. Tatar cäyelep tıñlarğa yarata. Xäzerge format- atnasına ike märtäbä berär säğätlek tapşıru samar tatarlarınıñ küñelenä xuş kiler dip uylıym. - Nailä xanım, tapşırular tar tatar qısalarında bulaçaqmı? Ällä säyäsätkä dä urın qalaçaqmı? - Tapşırular näq tormış ağımınça bulaçaq. - Nailä xanım, radiotapşırular bik qıymmät närsä bit. Tapşırular tüläwleme? - Gennadiy Zvyägin atnasına ike säğätne buşlay birä, ä menä eş xaqı, ğonorar tülämi miña. Menä inde öç ay buyına minem xezmätemä berkem dä ber tien dä tülämi. - Ä kem tülärgä tieş dip sanıysız? - Älbättä inde Gennadiy Zvyäginnan kötü urınsız. Çönki ul bolay da dulqında buşlay efir birde. Tatarnıñ aq bayları, märxämätleläreneñ küñelenä Xoday iñderer äle Allahı birsä. - Nailä xanım, ä buşqa eşli- eşli arısağız häm taşlap kitsägez? - Çuaş, muqşı telendägelär ğonorar bulmıy digäç, şunda uq taşlap kittelär. Taşlap kitü wariantın bötenläy wariant bularaq qararğa yaramıy. Samar tatarlarınıñ tele ülem tüşägendä. Keşelär süzneñ yañğıraşın işetügä moxtaclar. Samar malquarları soñğı un yılda bigräktä millätebez, dinebezgä yözläre belän borıldılar. Hiçşiksez “Aq bäxet” tapşıruların da üz qanatları astına alırlar dip ömettä yäşim. Bezneñ tatar: “Ömetsez şaytan ğına”,- di bit.

Şamil Bahawtdin, Samar

XS
SM
MD
LG