Accessibility links

шимбә, 10 декабрь 2016, Казан вакыты 00:20

Belarusta prezident saylawları ütte. Oppozitsiä namzäte räsmi näticälärne tanımayaçağın belderde


Prezidentlıqqa 4 namzät däğwa itä: xäzerge prezident Aleksandr Lukaşenkadan tış oppozitsiäneñ töp namzäte Aleksandr Milinkeviç, Liberal-demokratlar citäkçese Serhei Haydukeviç häm Sotsial-demokratlar citäkçese Aleksandr Kozulin. Milinkeviç räsmi näticälärne tanımayaçağın belderde häm tawış birü urınnarı yabılğaç, tarafdarların uram cıyınına çığarğa çaqırdı. Räsmilär fetnä oyıştıru tırışlıqları bastırılaçaq dip kisätä.

Xakimiättä 12 yıl torğan häm 3nçe möddätkä däğwa itkän Aleksandr Lukaşenka, uram cıyınnarı aşa xakimiätkä kilergä teläwçelärneñ "muyının borırğa" wäğdä itte.

Minskidan kilgän xäbärlärgä qarağanda, tawış birülär tınıç bara. Minskidağı Säyäsi tikşerenülär üzäge belgeçe Valeri Karbaleviç süzlärençä, saylawlar, sovet çorındağı şikelle, yaxşı oyıştırılğan. "Texnik yaqtan saylawlar äybät oyıştırılğan. Keşelär kilä, bülleten tutıra. Monı kürgän çit il küzätüçeläre beraz apştıraşta: berkem dä berkmne dä mäcbür itmi, di alar. Läkin tışqı yaqtan saylawlar sovet çorında da yaxşı kürenä ide", di ul.

Üzäk saylaw komissiäse kön urtasına uq saylawçılarnıñ yartısı tawışın birde, saylawlar ütkän, dip xäbär itte.

Karbaleviç süzlärençä, bu oçraqta saylawlarnıñ niçek ütüe tügel, ä tawışlarnıñ niçek sanaluı möhim. Anıñ süzlärençä, töp waqiğalar kiçkä taba kötelä.

Tawış birü urınnarı Qazan waqıtı belän kiçke 9da yabıla. Oppozitsiä namäzte Aleksandr Milinkeviç, tawış birü betkännän soñ tarafdarların uram cıyınına çığarğa çaqırdı. "Prezidentlar mäydanda saylanmıy. Läkin bez mäydanğa çığaçaqbız. Xärämläşü, yalğanğa "yuq" dip äyte öçen. Bez layıqlı yäşärgä telibez, bez dä keşelär!"'', dide ul.

Milinkeviçnıñ süzçese Serhey Vozniak süzlärençä, bu çara protest bularaq oyıştırılmıy, alar barı tik xalıq belän bergäläp näticälärne işetergä teli. "Bez anda räsmi näticälärne beläçäkbez. Bezneñçä, alar xärämläşterelgän bulaçaq", di ul.

Vozniak süzlärençä, alar tınıç miting oyıştırırğa cıyına, köç qullanular başlansa – monıñ öçen xakimiät cawaplı bulaçaq.

Prezident Lukaşenka Belarusta uram inqilabı bulmayaçaq dip belderde. Belarusnıñ iminlek xezmätläre protest belderüçelärne "terrorçı" dip sanayaçağın äytte.

Şimbä könne Europa Berlegeneñ tışqı säyäsät citäkçese Javier Solana tınıç protest çarasına qarşı köç qullanılsa, dönya cämäğätçelege moña kisken reaksiä belderäçäk, dip kisätte.

Ali Gilmi
XS
SM
MD
LG