Accessibility links

чәршәмбе, 7 декабрь 2016, Казан вакыты 00:54

Tuqay bülägenä 12 eş täqdim itelde


Gabdulla Tuqay isemendäge Tatarstan däwlät büläkläre här sänğät keşese öçen iñ yaqtı xıyal häm zur däräcä bulıp sanala. Uzğan yıldan başlap ul Tatarstan prezidentı isemennän birelä torğan büläk bularaq raslandı, yıl sayın 300 meñ sumlıq 3 büläk, törle sänğät yünäleşlärendä eşläwçe ostalarğa birelä. Bıyılğı büläklärgä däğwä itüçelärneñ sanı 23 törkemgä citte. Prezident qarşındağı Tuqay büläge komissiäse däğwätçelärneñ dokumentların tikşerep, alarnıñ iğlan itelgän tärtipkä täñgäl kilgännären isemlektä qaldırdı. Şulay itep, aprel' ayında, G. Tuqay tuğan köndä iğlan iteläçäk 3 laureat urınına xäzer 12 eş täqdim itelä.

Şulay itep, "Qazan Kremle miğmärlärenä" häykäle, Alabuğa şähärendä M.Svetaevağa, D.Staxeevqa, xärbi-internatsionalistlarğa quyılğan sınnar häm "Neftyanik" häykäle öçen anıñ avtorlar kollektivı.

Şulay uq 2004 yılda Tatarstan kitap näşriyätında dönya kürgän "Özergän cır ezlärennän" kitabı öçen Rafael' Mostafin, "Cäyäwle buran", "Köy ezläw" şiğer cıentıkları öçen Xarras Äyup, "Küñelem gölläre", "Qoyaşlı yañğır" kitapları öçen Rezida Välieva premiägä täqdim itelde. Monnan tış "Söyembikä", "Qıldan neçkä, qılıçtan ütken", "Yaralı büre" kitapları öçen Rabit Batulla, "Ğömer bizmäne", "Qaytu" kitapları, "Doğalı yıllar" ädäbi-publitsistik cıyentığı öçen Marsel' Galiev häm "Beskoneçnıy poyızd", "Qazanskie sneğa" kitapları öçen Rawil Boxaraev G.Tuqay laureatına kandidat buldı. Kompozitorlar arasınnan "Qaytu", "Su buyınnan änkäy qaytıp kilä", "Min sine şundıy sağındım", "Aq yualıqlı äniem" kebek yuğarı-sänğati patriotik häm grajdanlıq lirikası siklın, tarixi tematikağa bağışlanğan cırlar icat itkäne öçen Luiza Batır-Bolğari häm Baqi Urmançe turında "Cırlı-moñlı sınçı-tılsımçı" televizion muzıykal' fil'mnar siklı, kompozitor Färit Yärullin turında "Atılğan yoldız ezennän", Aleksandr Klyuçarev turında "Moñğa çornalğan yazmış", Salix Säydäşev turında "Säydäş teatrı", Mansur Mozaffarovqa bağışlap "Minem küñel siña endäşä" muzıykal' fil'mnarı öçen avtorlar kollektivı - alıp baruçı, ssenariy avtorı, muzıykal' äsärlärne başqaruçı İdris Gaziev, rejisser-quyuçı Nailä Sabitova da respublika premiäsenä däğwä itä. Rässamnar arasında - "Mäñgelek Qazan" tarixi räsemnär seriäse öçen Firinat Xalikov, tarixi temağa bağışlanğan "Xalıqnıñ ruxi tarixı" seriäse öçen Känäfi Nafikov häm Tatarstan Respublikasınıñ lirik tabiğät küreneşläre räsemnäre seriäse öçen Niqolay İndyuxov G.Tuqay premiäsenä kandidat itep quyıldı.

Gölnaz Şäyxetdin

XS
SM
MD
LG