Accessibility links

дүшәмбе, 5 декабрь 2016, Казан вакыты 19:46

Mojgada berençe tatar kitabı täqdim itelde


Soñğı yıllarda Udmurtiädä yäşäp icat itüçe 20 artıq avtornıñ icat cimeşläre - kitapları - dönya kürde. Mojgada yäşäwçe tatarlar arasında İlgiz Kadıyrovnıñ «Ğömer ağışları» isemle kitabı äle berençe genä. Şuña da Mojga xalqı ütkän şimbädä «Dubitel'» mädäniät sarayına älege kitapnı täqdir itü kiçäsenä küpläp cıyıldı. Avtor İlgiz Kadıyrov kiçädä şuşı kitapqa kergän küp kenä cırlar, şiğerlär tamaşaçığa berençe tapqır täqdim iteläçäk dip bilgeläp ütte.

Kiçägä maxsus Tatarstan Yazuçılar Berlegeneñ idärä äğzası Şahinur Mostafin kilgän. Ul kitap belän tanışıp çıqqan inde, avtornıñ icatına yuğarı bäyä birde.

İlgiz Kadıyrovnıñ näsel tamırları - Tatarstannıñ Arça töbäge. Avtornıñ tuğan yağınnan da kiçägä wäkillär kilgän ide. Alar arasında Arça xakimiäteneñ mädäniät bülege citäkçese, İlgiz Xänif ulınıñ uquçısı Şäfiğulla Ğäripov ta bar ide.

Şäfiğulla Ğäripov süzlärençä, ul İlgiz Kadıyrovnı bügen dä üzeneñ ostazı itep sanıy, ul şulay uq uqıtuçısınıñ tarix häm cämğiät beleme däreslären bügen dä yaxşı xäterläwen söyläde. Uqıtuçısınıñ tormışı, icatı aña bügen dä ürnäk bulıp qala birä. İnde kitabı näşer itelüen şulay uq zur quanıç dip belderde.

Arça rayonı Şterä awılı mäktäbe direktorı Rädif Ğäräpşin süzlärençä, awılda İlgiz Kadıyrovnı bügen dä yaxşı xäterlilär ikän, anıñ kitabın täqdir itü kiçäsenä awıl xalqı da küpläp cıyılğan.

Avtornıñ kitabı Mojga şähärendäge tatar sıynıfları uqıtuçılarına qullanu öçen bik kiräkle uqu äsbabı bulaçaq, dip urtaqlaştı Nadiä Walieva. Uquçılar kiçädä bu kitaptan berniçä şiğerne säxnädän söyläde, cırların başqardı.

Ğomümän, kiçä bik cılı ütte. Tamaşaçılar yaña cırlar belän tanıştı, şiğerlär tıñladı. Alar üzläre arasında şuşındıy şäxes yäşäwenä bik şat. Bu fikerne Mojga şähäreneñ urmançılıq kombinatı citäkçese İlgizär Xäsänev citkerde.

Xämidä Ğayfullina, Udmurtiä.

XS
SM
MD
LG