Accessibility links

дүшәмбе, 5 декабрь 2016, Казан вакыты 23:54

“Büre toqımı” qayda da bireşmi


Mäğlüm bulğança, 2006нчы yıl Tatarstanda ädäbiät häm sänğät yılı dip iğlan itelde. Böyek tatar ädipläreneñ häm sänğät ostalarınıñ yubileyları yılında Ural töbägendä yäşäwçe küp kenä kürenekle tatar keşeläre dä üzläreneñ tügäräk ğömer bäyrämnären bilgeläp ütälär. Çittä yäşäwçe tatarlar arasında millätneñ yöze bulıp sanalğan, keşe arasında bik abruylı millättäşlärebez bu yıl yubileyların bäyräm itä.

Yıl başınnan uq Yekaterinburg şähärendä andıy bäyrämnärne benefis konsertlar belän Tatarstannıñ atqazanğan artistı Xäydär Gıyyl'fanov häm Ural töbägeneñ tanılğan cırçısı Zölfiä Möbäräkşina bilgeläp üttelär. Ä küptän tügel Sverdlovski ölkäseneñ Tübän Sırğa rayonı Aqbaş awılı keşeläre xörmätle aqsaqal Gäräy abıy Färxetdinovnıñ 70нче tuğan könen uzdırdılar.

Awıl klubı ul könne xalıq belän şığrım tulı ide. Gäräy abıynı ğömer bäyräme belän qotlarğa dip Sverdlovski ölkä xökümäte wäkile, rayon xakimiäte citäkçese, deputatlar, Tatarstannıñ häm Başqortstannıñ Ural töbägendäge daimi wäkilläre, Yekaterinburg şähärennän ölkä tatar milli oyışmaları citäkçeläre, tatar cırı ostaları, jurnalistlar kildelär.

Mondıy zurlawlarğa Gäräy abıy bik layıq keşe.

Här awılnıñ üzeneñ yözek qaşı bulırday keşese bula. Şunıñ kebek, Aqbaşnı da Gäräy abıysız küz aldına kiterü mömkin tügel. Yäştän ük tınğısız xolıqlı bulğan Gäräy, dustı Färğät belän bergä, balaçaqları awır suğış yıllarına turı kilsä dä, uqular, bu yaqlarda berençelärdän bulıp yuğarı belem aluğa ireşälär. Bar ğömerlären tuğan awılları Aqbaşqa bağışlağan bu ike aqsaqalnı awıldaşları bik xörmät itälär.

Uqıtuçı, mäktäp direktorı bulıp bik küp yıllar eşli Gäräy abıy. Awılnıñ här keşese diärlek anda tärbiälänep çıqqan disäñ dä bula. Ber ük waqıtta partiä eşlärennän dä baş tartmıy, partkom sekretare wazifasın başqara. Awıldağı ber genä çara da Gäräy abıy qatnaşınnan başqa ütmi. Soñraq anı awıl sovetı räise itep saylıylar. Olısı da, keçese dä bik ixtiram itälär anı. Färxetdinovlarnıñ ğailä tormışı da başqalarğa ürnäk bulıp torırlıq. Laçınday öç ul üsterep, alarnıñ barısına da yuğarı belem birgännär. Bügen ulları, kilennäre, onıqları tormıştağı uñışları belän quandırıp toralar. Ätilären-änilären bik xörmät itep yäşilär.

- “Bu näseldä yalqawlar bula almıy, - dilär awılda, - Gäräynekelär - ataqlı näsel - büre toqımınnan”. Gäräy abıynıñ tuğannan tuğan señlese, uqıtuçı Miläwşä ğabdraxmanova üzeneñ qotlaw süzendä bu toqımnı bik döres taswirladı. “Bez, borınğı büre toqımı, küpbez, - dide ul, - Aqbaşta, kürşe awıllarda ğına tügel, Mäskäwdä dä, Peterburgta da, Vladivostok yağında da, çit ildä dä bez küp. Sin, Gäräy abıy, dala östendä oçqan börket kebek, barıbıznı da küzätteñ, yalğışsaq, tözätteñ, aşıqsaq, tuqtattıñ. Sine tıñlap, uqırğa, keşe bulırğa tırıştıq. Sin qarlığaçtan könne, sanduğaçtan tönne soramıyça eşlädeñ dä eşlädeñ. Bez barıbız da sinnän ürnäk alabız”.

Eşe belän, ğädellege, turı süzle, nıqlı ixtıyarlı bula belüe belän ixtiram qazanğan ğadi awıl keşese Gäräy abıy Färxetdinovnıñ ğömer bäyrämen şundıy yuğarı däräcädä bilgeläp ütü tatar awılı Aqbaşta yäşäwçelär öçen zur ğorurlıq uyattı.

Fäwiä Safiullina,Yekaterinburg

XS
SM
MD
LG