Accessibility links

шимбә, 10 декабрь 2016, Казан вакыты 02:05

26 Mart Ukrainada parlament saylawları – Äflisun İnqilabınıñ "soñğı cırı" bulırmı?


Bu yäkşämbedä Ukrainada ütäçäk parlament saylawları zur ähämiätkä iä. Berençedän, yaña parlament küpkä köçleräk bulaçaq, Ukraina prezident respublikasınnan parlament respublikasına äylänä. İkençedän, bu saylawlar - prezident Yuçenko üzeneñ säyäsäten däwam iterme, ällä anıñ köndäşläre belän qarşılığı tağı da köyçäyerme digän möxim sorawğa cawap biräçäk.

26 Martta ütäçäk parlament saylawlarında barlığı 45 blok häm partiä köräşä. Läkin 450 urınlı Yuğarı Radağa şularnıñ berniçäse genä ütäçäk. Fiker beleşülär döres bulsa, berençe urınnı, 30% çaması tawış belän Regionnar partiäse alırğa tieş. Bu partiäne 2004 yıl prezident saylawların ottırğan Viktor Yanukoviç citäkli. Äflisun inqilabın oyıştırğan Viktor Yuçenko belän Yulia Timoşenkonıñ yulları ayırılğannan soñ, bu yulı alar, ber ük tawışlar öçen, ayırım-ayırım köräşäçäk. Yuçenkonıñ "Bezneñ Ukraina"sı da, Timoşenko bloğı da 10 belän 20% arasında cıyar dip kötelä. Şuşı 3 töp köçneñ näticälärennän çığıp, alğa taba 2 mömkinlek bar.

Berençe mömkinlek. Yuçenko belän Timoşenko, üpkälären çitkä quyıp, qabat berläşä. Bu oçraqta Ukraina Yewropa Berlege häm NATOğa kerü yulın däwam itä digän süz. Bu ixtimalnıñ qıtırşı yağı şunda: Timoşenko üzen fäqät premier itep kürä. Xäzerge premier, Bezneñ Ukraina isemlegendä berençe urında torğan Yuri Yexanurov ber qaya da çigenergä cıyınmıy. "Bez professionallar. Uzğan yıl citärlek tuqmaldıq, täcribä tupladıq, xäzer ayaqta nıq torabız. Bügen xökümäkä başqa köçne kiterü döres bulmas ide", di Yuri Yexanurov.

İkençe mömkinlek. Yuçenko belän Yanukoviçnıñ berläşüe. Berençe qaraşqa, mömkin tügel dip kürensä dä, bu ixtimalnı alarnıñ berse dä älegä kire qaqmadı. "Bez äle söyläşülär alıp barmadıq, saylaw näticläre bulmıyça, alıp barmayaçaqbız da. Saylaw aldı kompaniäsendä bez kemneñ kem ikänen kürdek. Mondıy qararnı partiäneñ şurası ğına qabul itä ala", di Viktor Yanukoviç

Yuçenko-Yanukoviç koalitsiäse tözelgän xäldä, anıñ Radada xuplawı zur bula ala. Läkin bu ixtimalnıñ qıtırşı yaqları tağı da kübräk. Berençedän, bu köçlärneñ ikesendä dä oligarxlar tulğan, ul aqça qapçıqlarınııñ mänfäğätläre yış qına qapma-qarşı. Monnan tış geo-säyäsi qarşılıqlar bar. Regionnar partiäse Rusiägä yaqın, Bezneñ Ukraina – Könbatışqa. Mondıy ike ügezne ber abzarda totu öçen küp köç häm aqıl kirök bulaçaq.

Ä inde öçençe mömkinlek – Timoşenkonıñ Yanukoviç belän berläşüğa kilgändä – anıñ ixtimalı yuq däräcäsendä. Timoşenko üze dä bu ixtimalnı qatğıy räweştä kire qaqtı.

Şulay itep, 26 Martnı kötäse qaldı. Älegä şunı äytep bula, bu saylawlardan soñ prezident Yuçenko nindi genä yul saylamasın, ul il belän elekke prezident Kuçma kebek, Radanı tezländerep, basım, rişwät, şantajlar belän idarä itä almayaçaq.

Ali Gilmi
XS
SM
MD
LG