Minskiyda 15 täwlektän soñ Belarus xalıq frontı başlığı Vinsuk Veçerko irekkä çığarılğan. Veçerko jurnalistlarğa, ul utırğan maxsus bülektä tağın 200 keşe qaldı dip, xäbär itte. Belarusnıñ Üzäk saylaw komissiäse oppozisianeñ saylaw näticäläre yalğan dip beldergän raslawların kire qağıp, Aleksandr Lukäşenkonı räsmi räweştä ilneñ yaña saylanğan prezidentı dip iğlan itte. İnaugurasia 31 martqa bilgelängän. Saylaw näticäläreneñ yalğan buluı xaqında şikayätlärne Üzäk saylaw komissiäsenä, prezidentlıqqa nämzät bulğan Aleksandr Kozulín, «Belarus respublikasınıñ saylawçılar klubı» dip atalğan ictimağıy oyışma häm Belarusnıñ «Helsinki komitetı» yullağan ide. Minskiy üzägendä bişençe kön inde saylaw näticäläreneñ döres bulmawına qarşılıq aksialäre däwam itä. Xoquq yaqlawçı «Human Rights Watch» häm «Xalıqara amnistiä» oyışmaları, uram cıyınnarında qatanaşuçılarnı totqarlaw häm qıynawlarğa gäyepläw belderde. Xoquq yaqlawçılarnıñ mäğlümätlärenä qarağanda Belarusta 400gä yaqın keşe totqarlanğan.
