Accessibility links

сишәмбе, 6 декабрь 2016, Казан вакыты 19:00

Tymoşenko: Yanukoviç ciñsä Ukrainanıñ kiläçäge qarañğı


Ukraina prezidentı Viktor Yuşçenko 2005neñ sintäberendä Yulia Tymoşenkonı premyer-ministr wazifasınnan çitlätep – alda torğan saylawlarğa üzenä köndäş yasadı.

26 mart könne ütäçäk parlament saylawlarında Yuşçenkonıñ Bezneñ Ukraina säyäsi blogı küp tawış almas, dip farazlana. Töp köndäşlär bulıp säxnägä – Tymoşenkonıñ säyäsi blogı häm Viktor Yanukoviçnıñ Regionnar partiäse çığa. Azatlıq radiosı xäbärçese Askold Kruşelnisky Ukrainada saylawaldı wazğiäte iñ qızğan bu könnärdä Yulia Tymoşenko belän äñgämä qorğan. Yanukoviçnıñ Regionnar firqase häm Bezneñ Ukraina blogınnan torğan koalisiäne Tymoşenko – Ukraina öçen qurqınıç dip atadı:

"Şuña kürä, keşelär miña – Yuşçenkonıñ Bezneñ Ukrainası belän Yanukoviçnıñ Regionnar partiäseneñ koalisiä tözüe – yararlıq eş, dip äytkändä, min monıñ ni qädär naçar ikäne genä tügel, ä bez 18 ay elek başqarğan böten eşlärneñ axırı dip uylıym. Çönki bu yulı Yanukoviç parlamentqa Bezneñ Ukrainadan zurraq bulıp keräçäk, häm bigräk tä konstitusiädäge üzgäreşlärdän soñ premyer prezidenttan kübräk wäkälätkä iä bulğaç, Yuşçenko häm anıñ keşeläre – başqa keşeneñ üz säyäsäten ütkärüen qarap qına tora alaçaq, häm bu minemçä – qabul itelmäslek xäl."

Yulia Tymoşenko, Yanukoviç Ukrainanıñ üz säyäsäten könbatışqa qarap alıp baruın, xökümätneñ häm premyer-ministr Yuri Yexanurovnıñ bu yünäleştäge eşçänlegen üzgärtergä teli, dip sanıy. Şäxsän üze Tymoşenko üz ilen könbatış belän bergä kürä. Ägär dä Yanukoviç parlamentnıñ küpçelegen üz kontrolenä alsa, Ukrainanıñ kiläçäge qarañğı, di Tymoşenko.

"Min monıñ ni öçen faciğa buluına berniçä säbäp kiterä alam. Berençedän, min Regionnar partiäsen säyäsi firqa dip sanamıym, ul barı tik zur business klan, alar üz mänfäğätlären qayğırtaçaq, şul sanda qanunsız eşlären dä, alarnıñ eşläre ildä qanun häm ğädellektän östen bulaçaq."

Yulia Tymoşenko, Yuçenkonıñ anı uzğan yıl premyerlıq wazifasınnan çitläşterüenä üpkäsen yäşermäsä dä, parlamentta yaña Äflisün Koalisiäse öçen köräşergä äzer bulğanın belderde.

alsu qormaş
XS
SM
MD
LG