Accessibility links

якшәмбе, 4 декабрь 2016, Казан вакыты 21:31

Tatar qızlarınıñ “Näwrüz güzäle” bäygese ütte


Atnakiç könne Ufada Başqortstan tatar qızlarınıñ “Näwrüz güzäle” bäygeseneñ final öleşe bulıp ütte. Älege bäyge Başqortstanda 1990 yıldan birle oyıştırılıp kilä. Bıyıl bu yarışmanıñ saylap alu öleşenä 34 tatar qızı ütkän ide. Ä finalğa şularnıñ 14 saylap alındı. Bäygeneñ yomğaqlaw öleşe Ufa “Nur” tatar däwlät teatrı artistları yärdämendä teatrlaştırılğan tamaşa räweşendä bardı. Äkiät dönyasına, xannar, xanbikälär çorına alıp qayttı bu kiçä. Öç säğät buyı däwam itkän şuşı tamaşada tatar qızları törle bäygelärdä üz sälätlären kürsätte.

Bäyge ütkän Başqortstan däwlät filarmoniäseneñ zur zalı tamaşaçılar häm bäygeçelärneñ tuğannarı, dusları belän şığrım tulı ide. Alar da qızlarğa köç birep, teläktäşlek kürsätep utırdı. Millät qızlarınıñ hämmäse dä zifa buylı, sılu. Törlese törle talantqa da iä – kemder matur itep cırlıy, kemder iskitmäle citez itep bii, sänğät''le itep şiğer uqi. Bixisap sorawlarğa cawaplar birep, üzläreneñ ğilem däräcäsen, zihenlegen dä kürsätte qızlar. Şuña kürä dä jyuri äğzalarına “Näwrüz güzälen” bilgeläw dä ciñeldän bulmağandır.

Bıyılğı Gran-prinı - “Näwrüz güzäle” isemen Stärlebaş rayonınnan 17 yäşlek kenä Läysän Säläxetdinova yauladı. Ul äle rayon üzägendäge 1 sanlı mäktäptä uqıp yöri. Älege bäygegä ul barı tik ciñü teläge belän genä kilgän. Şulay itep maqsatı tormışqa aştı. Bäygedäge ciñüe öçen Läysän tatar qızları qalfağı häm Törkiägä säyäxätkä yullama belän büläklände. Başqa qızlar da törle nominatsiälärdä bilgeläp ütelde häm alarğa da büläklär tapşırıldı. Nominatsiälär arasında “Şärıq güzäle”, “Akterlıq ostalığı”, “Näfis süz ostası”, “Tıynaqlıq”, “Yaz sanduğaçı”, “Citez çitek”, “Ömet”, “Tamaşaçı söyue” dip atalğannarı da bar ide.

Jyuri äğzaları bıyıl “Näwrüz güzäle” bäygeseneñ yaxşı äzerlängän buluın bilgeläde. Alar fikerençä, älege yarışmanıñ yomğaqlaw öleşenä çınlap ta iñ layıqlı qızlar çıqqan. “Başqa yıllarda bäygedä qatnaşuçı qızlarnıñ qayberläre tatar telendä dä wata-cimerä genä söyläşä ide. Ä bıyıl hämmäse dä ana telen yaxşı belülären kürsätte. Ğomumän, tatar qızı niçek bulırğa tieşlegenä ürnäk buldı bıyılğı qızlar”, - dip belderde “Azatlıq” xäbärçese belän äñgämädä jyuri äğzalarınıñ berse, Başqortstan Tatar kongressı Başqarma komitetı äğzası Äsğat'' Kormanaev.

“Näwrüz güzäle” bäygeseneñ äzerlek öleşe Ufa “Nur” tatar däwlät drama teatrında ütte. Anda finalğa çıqqan tatar qızları “Nur” teatrı artistları yärdämendä cırlarğa, biergä häm başqa hönärlärgä ostalıqların arttırdı. Teatrnıñ äydäwçe artistı, Başqortstannıñ atqazanğan artistı Mäxmüt Fatıyxov ta bıyılğı “Näwrüz güzäle” bäygeseneñ oyıştırıluı sıyfatına häm qızlarnıñ buldıqlılığına yuğarı bäya birde.

Şulay itep Başqortstan tatar qızlarınıñ “Näwrüz güzäle” bäygese tämam. Anıñ oyıştırıluı sıyfatına häm başqa mäs’älälärenä qarata mönäsäbät törleçä bulırğa mömkin. Ämma şunısı xaq – küp köç salıp äzerlängän häm küptän kötelgän bäyräm nihayät ütte häm bu üze dä zur qazanış inde.

Fänis Fätxi, Ufa

XS
SM
MD
LG