Accessibility links

җомга, 9 декабрь 2016, Казан вакыты 16:51

Tatar tele uqıtuçıları Qazanğa cıyıla


Rusiä töbäklärennän Tatarstanğa tatar tele uqıtuçıları, milli mäğärif belgeçläre cıyıla başladı. Alar Qazanda 28-29 martta uza torğan tatar tele uqıtuçılarınıñ IV Bötenrusiä qorıltayında qatnaşaçaq. Düşämbe könne Tatar kongressı Başqarma komitetı binasında älege çaranı oyıştıruçılar jurnalistlar belän oçraşıp, äzerlek eşläre, qorıltayda qaralası mäs’älälär turında söyläde. Jurnalistlar belän oçraşuda qorıltaynı oyıştıruçılarnıñ wäkilläre – Tatarstannıñ Fän häm mäğärif ministrlığınnan ministr urınbasarı Danil Mostafin häm Bötendönya tatar kongressı citäkçese Rinat Zakirov bar ide. Alar bötenrusiä tatar tele uqıtuçıları qorıltayında qaralaçaq mäs’älälär belän tanıştırdı, Rusiä töbäklärendäge milli mäktäplärneñ problemaları xaqında söyläde, oyıştıru eşläre turında sorawlarğa cawap birde.

Qorıltaynıñ eşe sişämbe könne Kamal teatrı binasında uzaçaq plenar utırıştan başlanıp kitäçäk. Anda Tatarstan parlamentı räise Färit Möxämmätşin, ministr Räis Şäyxleslamov, tatar kongressı citäkçese Rinat Zakirov çığış yasayaçaq, könneñ ikençe yartısında süzne kilgän qunaqlarnıñ üzlärenä biräçäklär. 29 martta qorıltayda eş seksiälärdä däwam itäçäk. Uzğan atnada bez sezgä bu xaqta inde söylägän idek. İsegezgä töşerep ütäm, qorıltay barışında Milli mäğärifne oyıştıru ölkäsendä xakimiät belän ictimaği oyışmalarnıñ üzara xezmättäşlege, Mäktäp eşçänlegendä tatar etnomädäni komponentın qullanu, Tatarstannan çittä yäşäwçe tatarlarnıñ tel ixtiacların qänäğätländerüdä tatar telen rus telle mäktäplärdä uqıtunı oyıştıru, Mäğärifne zamançalaştıru şartlarında tatar mäktäplären saqlap qalu häm üsterü, Mäktäpkäçä belem birü üzäklärendä ana telendä tärbiäläw häm uqıtu öçen şartlar tudıru, tatar yäkşämbe mäktäpläreneñ eşçänlege häm problemaları digän seksiälär eşläyäçäk, dip äytelgän ide. Soñğı könnärdä genä qorıltaynıñ programmasına tağı ike seksiä östälgän. Alar Rusiä subyektlarınıñ maxsus belem birü uqu yortlarında milli kadrlar äzerläw mäs’äläläre häm Dini uqu yortlarında tatar telen uqıtu digän temağa bulaçaq. Çarağa Rusiäneñ 60 töbägennän kilgän tatar tele uqıtuçıları, tatar mäktäpläre citäkçeläre, balalar baqçaları tärbiäçeläre, yäkşämbe mäktäpläre belgeçläre, ğalimnär, töbäklärdäge mäğärif idäräläre wäkilläre üzlärenä yaqın bulğan temadağı seksiädä fiker alışaçaq. Bu xaqta jurnalistlarğa Danil Mostafin söyläde.

Rinat Zakirov isä, oçraşuğa kilgän mäğlümät çaraları wäkillärenä kilgän delegatlar belän kübräk aralaşırğa, alardan xäl itelergä tieşle mäs’älälär, eşlärendäge problemalar turında soraşırğa täqdim yasadı.

Qorıltayğa kilüçelärne jurnalistlar belän oçraşular, fiker alışular, problemalar turında kiñäşläşülärdän tış, bay mädäni programma da kötä. Qunaqlar tatar yazuçıları, jurnalistlar, cämäğät eşlekleläre belän oçraşaçaq, Kamal teatrında Telsez küke spektaklen, Qazan biü ansamble çığışın qarayaçaq. 29 mart kiçendä cıyılışta qatnaşuçılar öçen Fän häm mäğärif ministrlığı, Tatar kongressı isemennän qabul itü çarası da oyıştırılaçaq. Çittän kilgän qunaqlarğa büläklär dä äzerlängän. Alarğa tatar kitapları, metodik äsbaplar, ä respublikanıñ premyer-ministrı isemennän üz eçenä 1500 tatar cırın alğan karaoke cırlaw caylanması tapşırılaçaq.

Gölnaz İlgizär

XS
SM
MD
LG