Accessibility links

җомга, 9 декабрь 2016, Казан вакыты 03:14

Ukraina parlament saylawları näticäläre: Yanukoviç ciñep tä ottırır kebek


Ukrainada yäkşämbe könne ütkän parlament saylawlarınıñ täğäyen näticäläre sişämbe könne genä mäğlüm bulaçaq. Ämma berençel näticälärgä qarağanda Viktor Yanukoviçnıñ Mäskäwgä yöz totuçı Regionnar Partiäse 27 protsent tawış cıyıp berençe urın alırğa oxşıy. Ämma ul bu saylawlarda berençe bulıp ta ottırırğa mömkin. Ägär Äflisun inqilabında bergä bulğan, parlament saylawlarında köndäşlärgä äwerelgän ike partiä yañadan berläşsä Yanukoviç yaña xökümät tözi almıyaçaq, parlamenttağı urınnar belän genä çiklänergä mäcbür bulaçaq. Yanukoviç Kievta Mäskäwgä qarağan xökümät oyıştırır dip ömetlängän Rusiä öçen bu naçar xäbär bula ala.

Tawışlarnıñ çiregen sanaw näticälärenä qarağanda Yanukoviç 27 protsent çaması tawış cıyğan. Prezident Viktor Yuşçenkonıñ Bezneñ Ukrainda partiäse isä 16 yarım protsent belän öçençe urında ğına bara. Yäkşämbe kiçendä tawış birü urınnarındağı fiker beleşü näticälärenä qarap Yanukoviç monı bik möhim ciñü dip atadı häm Regionnar Partiäse xökümät oyıştıru eşenä äzer dide.

"Bez ukrain yäki rus buluına, äflisun tösendäge yäki zängär şarflı buluına, Donetski, Qırım, Kiev yäki Lvivta yäşäwenä qaramastan härber Ukrain watandaşınıñ bügengese häm kiläçäge öçen cawaplılıqnı östebezgä alırğa äzer. Bügen bez berdäm Ukraina" dide Yanukoviç.

Ämma saylawlardan soñ waqıt ütkän sayın Ukrainanıñ kiläçäk xökümätendä äflisun töse köçleräk bulırğa, ä Yanukoviç partiäse töse, yäğni zängär tös bötenläy bulmasqa oxşıy bara.

Yuşçenkonıñ Bezneñ Ukrainası öçençe urında ğına buluına qaramastan xökümätne üz qulında saqlap qalır kebek. Bezneñ Ukraina saylawlarda 23 yarımlap protsent tawış belän 2-nçe urınğa çıqqan elekke premyer ministr Yulia Timoşenko blogı häm Oleksandr Moroznıñ sotsialist partiäse belän xökümät koalistiäse tözer dip kötelä. Sotsialist partiä 7 protsent çaması tawış cıyğan. Yäkşämbe kiçendä Timoşenko mondıy mömkinlekkä zur ışanıç beldergän ide.

Sotsialist partiä citäkçese Yosip Vinskiy Bezneñ Ukrainanı koalitsiä kileşüen kiçekterüdä ğäyepläsä dä, prezident yardämçese İvan Vasyunuk Prezident koalitsiä tözü turında saylawlarnıñ täğäyen näticäläre iğlan itelgännän soñ ğına söyläşergä teli dide.

Ukrainada yañadan äflisun xökümäte tözelep reformalarnıñ däwam itüen Könbatış xuplar kebek. Ä menä Rusiägä bu kiresençä oşamasqa mömkin.

Mäskäwdäge Säyäsi Tikşerenülär İnstitutı mödire Sergey Markov. Ukrainağa ul Rusiä Cämäğät Pulatınıñ küzätüçelär törkeme äğzası bularaq kilgän.

"Şäxsän, Rusiä wäkile bularaq min Regionnar partiäsen, Komunistlar partiäsen, Vitrenko partiäsen, Ne Tak partiäsen, Lıtvın blogın berläşterüçe koalitsiä tözelüen, alarnıñ Rusiä belän mömkin qädär yaqınayırğa omtıluın telim. Koalitsiäneñ törle çiklärgä yul quymawın telim. Çönki äflisun koalitsiäse Ukrainanı Rusiädän köç belän tartıp alırğa häm ikegä bülergä tırışuı belän zur totrıqsızlandıruçı köç buldı" dide Markov.

Yanukoviç başqa partiälärne dä koalitsiägä berläşergä çaqırğan. Ämma anıñ 450 urınlı parlamentta küpçelekne cıya aluı bik şikle.

Ä parlamentta küpçelekkä iä bulu bik möhim. Çönki yaña xökümätneñ zur öleşen parlament tözi. Premyer ministrnı da parlament raslıy.

Saylawlar aldınnan Yuşçenko palramentta Yanukoviç belän koalitsiä tözergä mäcbür bulaçaq digän farazlar da buldı. Äflisun koalitsiäse turında kileşügä ireşä almasalar, andıy Yanukoviç-Yuşçenko koalitsiä tözelü mömkinlege bar. Qayberäwlär mondıy çişeleş Könbatışnı da Rusiäne dä qänäğätländerer ide dip isäpli.

Yuşçenko citäkçelgendä Kiev Mäskäw mönäsäbätläre haman salqın kileş qala. Uzğan ber yılda bu ike kürşe, tabiği gaz bäyäläre, Rusiäneñ Aqyardağı xärbi diñgez flotı öçen arenda bäyäläre, Dnestr buyı töbäge öçen Ukrainada yaña tamojnya qağidäläre kertüenä bäyle berniçä märtäbä çäkäläşep aldı.

Markov Ukraina xakimiätendä teläktäş parnerlarnıñ az qaluına Rusiä üze dä öleşçä ğäyeple di.

"AQŞ häm Yewropa Berlegennän ayırmalı bularaq, soñğı 15 yılda Rusiä Ukrainadağı berektäşlärenä az yaqladı itte. Şuña kürä anda premyer wazıyfasına Rusiä yaqlı ber genä namzät tä yuq diärlek. Anda yä Bezneñ Ukrainanıñ Yexanurovı kebek Rusiägä qarşı, yä Yanukoviç kebek tarafsız, yä Yulia Timoşenko kebek çağıştırmaça açılmağan ideologiäle nazmätlär. Anıñ qay yaqqa borılaçağı berkem dä äytä almıy" di Markov.

Şulay da Timoşenko Rusiä belän mönäsäbätlärdäge ber adımı turında aldan uq äytep quydı. Ul premyer wazıyfasına kilgän oçraqta Rusiädän tabiği gaz alu bäyälären kütärü turında bu yıl başında tözelgän kileşüne yañadan qarıyaçağın belderde.

Naif Aqmal, Praga.
XS
SM
MD
LG