Accessibility links

пәнҗешәмбе, 8 декабрь 2016, Казан вакыты 03:11

Ukrainada parlament saylawları Yulia Timoşenkoğa zur mömkinleklär birä


Ukrainada uzğan yäkşämbe könne ütkän parlament saylawlarında tawışlarnı sanaw tämamlanıp kilä. Bu saylawlarda yaqlawnı nıq yuğaltqan prezident Viktor Yuşçenko Äflisun inqilabında qatnaşqan törkemne yañadan cıyu turında söyläşülär başladı. Çönki ul köçlärne bergä tuplağanda, Viktor Yanukoviçnıñ Rusiägä yöz totuçı häm saylawlarda 1-nçe urınğa çıqqan Regionnar partiäse ciñelüçe bulaçaq.

Bu saylawlarda kemneñ ciñelüçe ikäne bik açıq kürende. Ul prezident Viktor Yuşçenko häm anıñ Bezneñ Ukraina partiäse.

Äflisun inqilabı turında kitap yazğan Askold Kruşelnitski "Bu Yuşçenko häm anıñ Bezneñ Ukrainası öçen bik zur mäsxärä. Ber yıl çaması elek kenä fiker beleşülär 70 protsenlap xalıqnıñ anı yaqlawın kürsätkän ide. Häm xäzer ul 20 protsenttan da tübän tägärägän. Bezneñ Ukraina öçen bu bik yaman. Regionnar partiäse iñ küp tawış cıyaçaq dip kötelsä dä anıñ partiäse ikençe urınnı alır häm Yulia Timoşenko blogı belän koalitsiädä zurraq partner bulır dip uylanılğan ide" di.

Yuşçenko yaña parlamentqa kerüçe säyäsi partiälär citäkçeläre belän kolaitsiä tözü turında söyläşülär başladı. Berençel näticälärgä qarağanda, uzğan yäkşämbedä ütkän parlament saylawlarında ber partiä dä küpçelek tawışlarnı ala almağan.

Tawışlarnıñ 80-läp protsentın sanaw näticälärenä qarağanda, Viktor Yanukoviç citäkçelegendäge Rusiägä yöz totuçı Regionnar Partiäse 30 protsent tawış cıyğan. 2004-nçe yıl axırında ütkän prezident saylawlarında Yanukoviç Yuşçenkoğa ottırğan ide. Yuşçenkonıñ Bezneñ Ukraina partiäse 15.2 protsent tawış belän öçençe urında bara. İkençe urında isä Äflisun İnqilabında Yuşçenkon berektäşe bulıp premyer ministr urının alğan, uzğan sintäberdä xökümät citäkçelegennän çitläşterelep oppozitsiägä küçkän Yulia Timoşenko blogı.

Yaña parlamentta 3 protsentlı kirtäne ütep tağın 2 partiä urın ala. Alar Sotsialist partiä häm Kommunistlar partiäse.

Timoşenko bu saylawlarnıñ çın ciñüçese diärgä mömkin. Saylaw näticäläre säyäsi uyınnar öçen aña iñ zur mömkinleklär birä.

Yuşçenkonıñ Yanukoviç belän koalitsiä tözü mömkinlege bulır ide, ämma mondıy adım anıñ xalıq arasında qalğan tarafdarların da yuğaltuına kiterä ala.

Şulay itep Yuşçenkonıñ berdänber yulı bulıp Äflisun inqilabındağı berektäşe belän yañadan quşılu qala.

Askold Kruşelnitski "İñ zur kirtä şäxeslär qarşılığı. Yuşçenko häm aña bik yaqın keşelär şäxsän Timoşenkoğa bik nıq qarşı. Şulay uq alar Timoşenkonıñ koalitsiä tözegän oçraqta Yuşçenkonıñ iñ kürenekle 5-6 berektäşeneñ citäkçe wazıyfalarınnan citläşterelüen taläp itäçäge turında da belä" di.

Timoşenko barı tik Äflinun köçlären berläşterü genä Yanukoviçnıñ Rusiä yaqlı köçläre kütärelüne tuqtata ala, häm Bezneñ Ukraina, şulay uq Sotsialistlar belän koalitsiä tözü memorandumı äzerlänä dide.

Timoşenko mondıy kileşüne tawış birü tämamlanğaç uq imzalarğa äzer ide. Ämma Yuşçenko älegä bik aşıqmıy.

Yuşçenko sişämbe könne iñ başta Yanukoviç belän oçraşıp söyläşte. Timoşenko häm Sotsialist partiä citäkçese Oleksandr Moroz belän oçraşuğa çirat annan soñ ğına citte.

Häm ul xökümättäge urınnarnı büleşü turında tügel, ä urtaq qimmätlär sisteması turında kileşergä çaqırdı.

Naif Aqmal, Praga.
XS
SM
MD
LG