Yäşlär, sport häm turizm ministrlığı belgeçläre, berniçä turistik şirkät wäkilläre, bu könnärdä, Mäskäwdä ütkän «İnturmarket-2006» kürgäzmäsendä qatnaşıp qayttı. Andıy çaralarda alar daimi qatnaşa, ämma Qazannıñ 1000 yıllığınnan soñ, turistik bazardağı xäl nıq üzgärde, di ministrlıq xezmätkärläre. Qazannı xäzer belälär, tanıylar. Turistlarğa kürsätelüçe xezmätlärneñ sıyfatı ällä ni yaxşırmasa da, Qazannı kürergä kilüçelär barıber artqan. Tatarstan qunaqların qabul itüe şirkätlär, turistlarnıñ sanı küpkä artuın bilgeli. Mäskäwdäge kürgäzmälärdä qatnaşuçılar xäbär itkänçä, belgeçlär dä, yal itüçelär üzläre dä, Qazanğa başqa küz belän qarıy xäzer. Qazan häm Tatarstannıñ tarixi urınnarın kürsätüçe «Qazan - säyäxätlär byurosı» bezneñ sorawğa, xäzer bezgä tulı qanlı turistik ölkägä bulğan kebek qarıylar, 2005 yılğa qädär, mäktäp balalarınnan torğan 1-2 törkem kilep kitsä, xäzer olılar da kilä, törkemnär sanı da şaqtıyğa arttı, dip cawap birde. Ber şirkättä, başqaları da, tögäl sannarnı äytergä telämäde, ämma turistlar sanı bermäber artqanın rasladı. Bezneñ töbäk belän qızıqsınalar, 1000 yıllıq turında işetkännär häm kürergä dip kilälär, dide «Qazan säyäxätlär byurosı» şirkäte wäkilläre. Kilüçelärgä xezmät kürsätü, qunaqxanälärneñ qıäfäte, bäyäläre, avtobuslarnıñ iskelege, yullarnıñ watıq buluı, zamança bädräflärneñ bulmawı häm başqa problemalar haman da aktual. Wazğiät üzgärä, ämma äkren, dip äytä turistlarnı qabul itüçelär. Tatarstan isemennän Mäskäwdäge kürgäzmälärdä, turizm ministrlığınıñ belgeçe Evgeniä Novikova barğan. Anıñ äytüenä qarağanda, «İnturmarket-2006» kürgäzmäsendä eşlägän stendlar yanına keşe küp kilgän. Tatarstan digäç, şunduq Qazannıñ 1000 yıllığın iskä töşerep, başqalanı kürergä, yañadan kilep kitärgä teläk beldergän. Turistik şirkätlär dä, Qazanğa turistlarnı alıp kilergä cıyınğan kollegaları belän kileşülär tözede.
Xäzer, tatarstanğa säyäxätlär oyıştıruçılar, Alabuğanıñ 1000 yıllığına ömetlär bağlıy. Alabuğa muzey tıyuluğı yıl sayın kürgäzmälärdä qatnaşa häm şulay uq, kiläse yılğa bilgelänep ütäse 1000 yıllıq bäyrämendä qunaqlar qabul itärgä äzerlänä.Bikä Timerova.
