Accessibility links

якшәмбе, 4 декабрь 2016, Казан вакыты 17:17

Äfğanstanda Taliban "yazğı höcüm" başladı


Soñğı könnärdä Äfğanstannıñ könyağında kierenkelek arta. Çärşämbegä qarşı töndä Taliban suğışçıları Helmand wilayätendä koalitsiä köçläreneñ nığıtmasına höcüm itkän. Ber amerikan, ber kanada xärbie, distälägän ğisyançını häläk bulğan. Taliban süzçese monı "yazğı höcüm" dip atadı.

Koalitsiä köçläreneñ Helmand wilayätendäge nığıtmasına höcüm çärşämbe irtäsendä tañ atırğa berniçä säğät qala başlanğan. Amerikan xärbiläre süzlärençä, anda şaqtıy küp ğisyançı qatnaşqan, soñğı yılda bu iñ zur höcüm bulğan.

"Ber Kanada xärbie, ber Amerikan xärbie häläk bulğan, tağın 5 xärbi yaralanğan", di koalitsiä köçläreneñ könyaq Äfğanstandağı xärbi citäkçese Britan polkovniğı Chris Vernon.

Anıñ süzlärençä, kolaitsiä köçläre cawap utı açıp, başta kimendä 12 ğisyançını yuq itkän. Koalitsiä oçqıçları eşkä kereşkäç, taliplar çigenä başlağan, şunda alarnıñ tağın 2 distäse häläk bulğan.

Başqa qoral belän bergä höcümçelär mina-atqıçlar da qullanğan. Monısı taliplar öçen yaña qoral. Amerikan xärbiläre fikerençä, alar anı Ğiraqtağı ğisyançılardan ala.

Londondağı saqlanu belgeçe İan Kemp taliplarnıñ bu äwzemlegen NATO köçläreneñ könyaqtağı cäyelüe belän bäyli. Yänäse, Taliplar NATOnıñ bu ğämälenä qarşı cawap qaytara, üzenä kürä PR-ğämäl.

"Bu çın mäğnädä höcüm dä tügel. Ğisyançılarğa, zıyan kiterü öçen artıq küp keşe dä kiräkmi. Här şartlaw, här bomba, här märgän xalıqara iğtibarnı cälep itä. Bigräk tä koalitsiä illärendä. Monıñ işe höcümnär küp yıllar, şul uq sovetlarğa qarşı da küp buldı", di İan Kemp.

2001 yılda Taliban bärep töşerelgännän soñ, bulğan xärbi bäreleşlärdä Helmand töbäge iñ zur zıyan kürde. Xäzer anda NATO köçläre urnaşqan, anıñ üzägendä 4 meñ Britan xärbie.

Helmand gubernatorı süzçese Haci Möhetdin süzlärençä, könnär cılıtuğa Äfğanstn belän Paqstan çigendäge tawlarda yullar açılğan, xäzer ğisyançılar bu çikne ciñelräk ütep yöri.

"Helmandta höcümnär xäzer bik yış. Bez iminlek çaraları küräbez. Koalitsiä köçläre monda, moña östäp Äfğan armiäsennän ber brigada soradıq. Moñarçı politsiä genä ide. Şuña kürä ğisyançılar äwzem buldı da", di Haci Möhetdin.

Wilayätneñ Sangin öleşe bigräk tä tınçısız. Äfğan armiäse generalı Raxmatulla Raufi süzlärençä, çärşämbedä anda yulğa quyılğan bomba şartlaw näticäsendä 6 afğan xärbie xäläk bulğan.

ali ğilmi
XS
SM
MD
LG