Accessibility links

якшәмбе, 11 декабрь 2016, Казан вакыты 05:26

Şäymiev Süriädä…Mäğlümätlär genä saran


Tatarstan prezidentı Mintimer Şäymiev citäkçelegendäge Tatarstan räsmi delegatsiäseneñ Süriägä vizitı däwam itä. Bügen Süriä prezidentı Bäşär Asad üz rezidensiäsendä Tatarstan prezidentın qabul itäçäk.

Mintimer Şäymiev citäklägän ber törkem Tatarstan räsmiläreneñ bu säfäre turında bik saran xäbärlär kilä. Menä şundıy qabul itäçäk digän süzlär genä. Säfärneñ maqsatı äytelmi. Menä, respublika räsmiläreneñ här äyt digänenä wäyt dip tora torğan Tatar-inform pänceşämbedä tağın ber xäbär çığardı. Sitat.

Dimäşektä Tatarstan başlığı tuqtalğan “Meridian” qunaqxanäsendä Süriä Ğäräp Respublikasınıñ Ministrlar Sovetı Räise Möxämmäd Naci Atari bulıp kitte. Qunaqlar zalında Tatarstan Prezidentı belän Süriä Xökümäte başlığı äñgämäse uzdı. Mintimer Şäymiev Möxämmäd Naci Atariğa cılı qabul itüläre öçen räxmät belderde.

“Sezneñ vizit bezgä bik qäderle. Min Tatarstannıñ törle ölkälärdäge üseşe häm uñışların härdaim küzätep bardım. Faydalı xezmättäşlek öçen barlıq mömkinleklär dä bar dip uylıym, çönki teläklärebez mömkinleklärebezgä turı kilä”, - dip belderde üz fikeren Süriä Ğäräp Respublikası Ministrlar Sovetı Räise.

Sitat tämam. Menä şundıy räsmi bulğan xäbärdän, beläbez, Süriä premyerınıñ başqa eşe yuq, Tatarstannı küzätep barudan başqa. Läkin monısı inde, zamança äytsäk diplomatiä. Matur süzlär söyläw bezneñ citäkçelärgä genä tügel, çit illärgä dä xas. Bigräk tä ğäräplärgä. Cılı söyli dilärme äle bezneñ xalıqta.

Tatarstan prezidentınıñ Qazanda kalgan matbuğat üzäge xezmätkärläre dä su qapqannar kebek. Säfärneñ maqsatın añlatmıylar. Azatlıq matbuğat üzägenä şaltıratqaç, radio öçen söylärgä wäqälätebez yuq dip kenä cawap birdelär. Säfärneñ Putin fatixası belän buluın añlatıp, interfaxsta çıqqan Putin häm Şäymiev äñgämäsen fax belän cibärdelär. Xet monısı öçen räxmät. Çın küñeldän. Äñgämä qızıq. Putin ğäräp häm Rusiä illäre arasındağı mönäsäbätlär turısında söyli. Şäymiev möselmanlını bügen döres añalmıylar dip belderä. İslamnı pıçratalar di. Qayçandır, min ateist dip beldergän Tatarstan ilbaşı soñğı yıllarda islamnı yaqlıy ul. İntefaxsqa birgän äñgämäse moña tağın ber misal. Elegräk, respublika möselmannarı qorıltayında yasağan çığışın xätta bismilla belän başlağan ide. Monısı da diplomatiäme ikän.

Yarar, süzebez başqa närsä turında ide. Mintimer Şäymievnıñ Süriä, Küwäyt, Berläşkän ğäräp Ämirleklärenä säfäre. Bu säfär 3 nçe aprel'gä qädär däwam itäçäk. Qazanda çığa torğan, prezident äfändemezgä bik xörmät belän qarağan Zvezda Povolj'ya gäzite bu säfärne tarixi dip menä inde ike atna yaza. Rusiä öçen, kul'tovıy fiğura ul Şäymiev. Çönki Könbatışnı da Könçığışnı da berläşterä üzendä di. Yäğni, xristianlarğa da yarıy, möselmannarğa da. Şuña, gäzit yazuınça, Şäymievnıñ möselman illärenä säfäre tarixi. Putin moña bik küp ömetlär bağlıy ikän. Şäymievnıñ bu säfäre näticäsendä Tatarstanğa küp millionlı kontraktlar kiläçäk. Gäzit şundıy farazlar yasıy. Tatarstanğa ikän- bu inde Rusiägä. Tatarstan bit, prezident Şäymiev äytmeşli, Rusiä pravavoy polesında.

Här xäldä, interfaxsta çıqqan, Zvezda Povolj'yada basılğan yazmalarnı uqığannan soñ, Mintimer Şäymiev citäkçelegendäge säfär, Rusiäneñ möselman illäre belän mönäsäbätlären tağı da cılıtunı, yaxşırtunı maqsat itep quya. Şuña kürä, bu oçraqta, möselmannar küpläp yäşägän Tatarstannıñ, möselman-törki familiäle prezidentınıñ Rusiä belän möselman illäre arasın cayğa salıp yörüe bik faydalı.

Rusiä monı yaxşı belä. Avğanstanda suğış başlağan SSSRda bit, Fikrät Tabiev isemle Tatarstan başlığın Avğannarga posol- wäkil itep cibärgän ide. Tarix qabatlana disäñ inde. Bu oçraqta ul tağı da neçkä itep qabatlanuğa oxşagan.

Annan soñ, nindi genä çağıştıru kitermä, mäğnäsez. Çönki, säfär turında mäğlümat az. Preziden fälän belän oçraştı, tegeneñ belän oçraştı. Säfärdä qatnaşuçı, däwlätkä xezmät itüçe jurnalistlar şulay yaza. Soñ, mondağı Tatarstan xalqı, 4 million tatarstanlı, prezidentqa äytelgän maqtaw süzlären genä tügel, ä ni fayda kiteräçäk bu säfär ikänen dä, anıñ maqsatın da beläse kiläder bit. İli urıs äytmeşli, moña wäqälätlär, polnomoçiälär yuqmı... Xalıqnıñ belergä, citäkçe häm alarğa iärgän jurnalistlarnıñ äytergä …Ä bu yazma kiçke altıda äzerlände. Ul waqıtqa başqa mäğlümat yuq ide.

Räfis Cämdixan

XS
SM
MD
LG