Accessibility links

дүшәмбе, 5 декабрь 2016, Казан вакыты 07:28

«Tatnet yoldızları - 2006» başlana


1 April kölke köne genä tügel, «Tatnet yoldızları 2006» bäygese başlağan kön dä äle. Bu şimbädän 2006 yıl bäygesenä ğarizalar qabul itü başlana.

Bıyılğı «Tatnet yodızları 2006» bäygesendä tatar telendäge nominatsiälär sanı ike tapqırğa artqan. Elek tatarça internet saytlar yasawçılar, yarışnıñ tatar telendäge «Mäğlümat çarası» häm «Tuğan tel» digän törlärdä genä uzışa ala ide. Xäzer «Fän häm mäğärif» häm «Tatar dönyası» digän nominatsiälär dä östälgän.

Ütkän yılnı tatar internet säxifälär bäygesendä tatarça eşlängän internet saytqa eçtälege yağınnan turı kilgän nominatsiä tabılmağan ide. Ul waqıtta, tatar mäxälläseneñ tuğan teldä eşlängän säxifäsenä, bäygedä iñ turı kilgän nominatsiädä üzen kürsäter öçen urısça ğına eşlärgä turı kilgän bulır ide. Bäygene oyıştıruçılarnı berse Aynur Sibğatullin, bu xaqtağı sorawğa, tatarça säxifälär bik az, şuña kürä bulğannarın 2 törkemgä kertep qarıybız, dip cawap birgän.

Bıyıl oyıştıruçılar, säxifälärneñ kübräk buluına ömetlänep, nominatsiälärneñ sanın artırğan. Şulay uq, bäygegä, törle oyışmalarnıñ säxifälären, internetta alıp barıla torğan köndäleklärne, xakimiät oyışmaları ğına tügel, cirle üzidarä saytların da yarıştırırğa cıyınalar. Şulay uq, bıyıl oyıştıruçılar, mädäniät-sänğät belän bergä, tuğan yaqnı öyränü turındağı internet saytlarnı, päräwezdäge kürgäzmälärne, ayırım proyektlarğa, ictimaği oyışmalarğa bağışlanğan internet säxifälärne da «Tatnet yoldızı» iseme öçen köräşep qararğa çaqıra.

Tatar internetı 2006 bäygeseneñ internet säxifäse - tatnet.tatar.info Bıyılğı bäygeneñ yañalığı – jüri räiseneñ üzgärüendä dä. 3 yıl ütkärelep kilgän bäygedä «Tatarskaya gazeta» kebek, Tatnetta berençe internet säxifälärneñ berse, iñ küp keşe yöri torğan forum säxifäseneñ xucası İrek Bikinin jüri räise buludan tuqtağan. Bıyıl ciñüçelärgä diplomnar «Molodej Tatarstana» gäziteneñ baş möxärrire Rinat Bilalov imzası belän tapşırılaçaq. İnternet säxifälärgä bäyä birüçelär arasında, Azerbaycan, Kazaxstan internetı belgeçläre, tanılğan jurnalistlar, RUnet premiäse, Seber internet bäygesen oyıştıruçı şäxeslär kerä.

Ütkän yılnı Tatnet yoldızları bäygesendä ciñüçelärneñ berse itep «Tatar-inform» agentlığınıñ internet säxifäse tabılğan ide. Bıyıl qaysı säxifä iñ yaxşısı itep tanılır, 31 sintäberdän soñ belerbez.

Bikä Timerova

XS
SM
MD
LG