Accessibility links

якшәмбе, 4 декабрь 2016, Казан вакыты 23:24

Yaqın Könçığışta räsmi säfär däwam itä


Tatarstan prezidentı Mintimer Şäymiev citäkçelegendäge respublika delegatsiäseneñ Yaqın Könçığışqa räsmi eş säfäre däwam itä. Pänceşämbe, eşlekle säfärneñ berençe könendä prezident Süriä Ğäräp Respublikası Ministrlar Şurası räise Möxämmät Näcmi Otri häm Süriä prezidentı Başar Asad belän oçraştı. Söyläşüdä süz neft' eşkärtü, maşina tözeleşe ölkäsendä "Tatneft'", "KAMAZ" predpriätieläre belän xezmättäşlek itü, Qazan boralaqların satıp alu, Tatarstan başqalası häm Süriäneñ Damask qalası arasında oçqıç reysların açu turında süz bardı. Soñınnan "Meridian" kunakxanäsendä Süriäneñ utızdan artıq mäğlümat çaraları qatnaşında matbuğat konferensiäse ütte. "Tatar-inform" xäbärlärenä qarağanda, Mintimer Şäymiev Damask şähäreneñ tarixi urınnarın qarap, tanılğan Ömmätlär mäçetendä buldı. Mäçettä prezident Tatarstannan dini belem alırğa kilgän studentlar belän dä küreşte. Gıybadätxanäne qarap çıqqannan soñ respublika citäkçese, üzen ozata yörüçelär belän töp törbädä namaz uqıdı.

Kön "Meridian" kunakxanäsendä Tatarstan iqtisatın täqdim itü belän tämamlandı. Biredä "Tatneft'", "KAMAZ", "İdeya" texnoparkı ekspozitsiäläre quyılğan ide.

Comğada Tatarstan delegatsiäse Süriädäge "KAMAZ" predpriätieseneñ xezmät kürsätü üzägendä buldı. Monda Tatarstan delegatsiäsen tınlı orkestr qarşı aldı. Oçraşunıñ tantanalı öleşe qunaqlar öçen süriälelärneñ milli kiemnären kigän irlär başqaruında qılıçlı bayu belän tämamlandı. Mintimer Şäymiev vizitı xörmätenä servis üzägendä granit taqta açıldı, anda respublika başlığı iseme häm bügenge data yazılğan. Şunnan soñ Mintimer Şäymiev citäkçelegendäge delegatsiä Damasktağı “Tatneft'” wäkillegendä buldı. Alar kompaniäneñ Süriä territoriäsendä alıp barğan geologik-tikşerü eşläre qartası belän tanıştı. Monda neft' zapasları 3-6 million tonna külämendä farazlana. Tizdän tikşerü yasalğan skvajinalarnı borawlıy başlaw niätlänä.

XS
SM
MD
LG