Accessibility links

Кайнар хәбәр

IV qorıltay turında Omski uqıtuçıları


Mäğlüm bulğança, 28-29 mart könnärendä Qazanda tatar tele häm ädäbiäte uqıtuçıları, tatar etnomädäni komponentlı mäğärif oyışmaları xezmätkärläreneñ 4-nçe Bötenrossiä qorıltayı bulıp uzdı. Anda Rusiäneñ törle töbäklärennän 500-dän artıq keşe qatnaştı. Omskidan 13 delegat buldı. Comğa könne alar Omskiğa äylänep qayttılar. Delegatlarnıñ qayberläre belän min, vokzalda oçraşıp, qorıltayda tuğan xisläre, uy-fikerläre turında soraştım. Minem berençe äñgämädäşem Novosibirski ölkä tatar milli mädäni möxtariäte räise - Mödäris äfände Abakirov.

Soraw – Mödäris äfände, Sez qorıltay eşenä nindi näticä yasıy alasız?

Mödäris – näticä yasarğa älegä qıyın. Qorıltay rezolyutsiäsen bezgä citkerdelär. Qabat tikşerep çığarğa, uylaşırğa kiräk.

Minem ikençe äñgämädäşem dä Novosibirski ölkäsennän – Qıştaw rayonı mädräsäse mögällime Yaqup Abdulxak ulı Vaxitov. Ul qorıltay eşennän qänäğät qalğan. Andağı oçraşular, tanışular, barsı da yaxşı buldı di ul. Ürnäk alırlıq yaxşı misallar da oçrattıq, di Yaqup äfände.

Qorıltayda Tatarstan Prezidentı Ukazı nigezendä milli mäğärifne üsterüdäge, tatar telen, mädäniät häm ädäbiätne propagandalanudağı qazanışları öçen Omski, Penza, Ul'yanovski, Mäskäw Häm Başqortstannıñ qayber uqıtuçılarına “Tatarstan Respublikasınıñ atqazanğan uqıtuçısı” digän maqtawlı isem birelde. Omskidan bu isemgä şähärneñ 1-nçe pedagogiä kolliäteneñ tatar tele uqıtuçısı Gölsinä Axmerova layık buldı

Gölsinä xanım, täbrikläw waqıtında şul qadär dulqınlanğan ki, xätta räxmät äytergä dä onıtqan. “Azatlıq” radiosı aşa ul Tatarstan Prezidentına, Mägärif ministrlığına häm Bötendönya tatar kongressına räxmäten citkerüne ütende. Annan soñ ul qorıltay eşen uñay bäyäläwe turında äytte, Tatarstannan çittä bulğan töbäklärdä milli belemgä iğtibar az birelüe turında borçıluın belderde. “ Milli belem probleması Rusiä külämendä, federal' däräcädä xäl itelmäsä, tatar tele uqıtuçılarınıñ tırışlığı näticäsez qalaçaq”, - dide ul.

Äye, milli belem problemalarına Omski häm Novosibirski uqıtuçıları da bitaraf tügellär. Alarnı çişü yulları turında da uylıylar alar. Dörestän dä, federal' däräcädä milli belemgä iğtibar yünältelmäsä, problemalar tatar tele uqıtuçıları tırışlığı belän genä çişeler mikän?

Saniä Mirxaleewa, Omski

XS
SM
MD
LG