Accessibility links

дүшәмбе, 5 декабрь 2016, Казан вакыты 21:45

Akademik Osqar Kaybıyşev eşe buyınça mäxkämä däwam itä


Ufada yäşäwçe dön'yaküläm tanılğan tatar ğalime, Rusiä Fännär akademiäseneñ Ütä sığılmalı metallar problemaları institutınıñ elekke direktorı, akademik Osqar Kaybıyşev östennän başlanğan mäxkämä eşe däwam itä. Un kön tänäfestän soñ atnakiç könne yañadan başlanğan mäxkämä utırışları comğa könne dä Başqortstan Yuğarı mäxkämäsendä ütte. Äle bu utırışlarda şahitlarnıñ çığışları tıñlana. Alar siksängä yaqın keşe dip xäbär itkän ide Yuğarı mäxkämä matbuğat üzäge wäkilläre.

Elegräk tä xäbär itelüençä, Osqar Qaybışevnı çit illärgä Rusiäneñ ike täğäyenläneştäge sänäğät texnologiälären satuda häm finans mutlıqlarda ğayıplilär. Ä tanılğan akademik üzenä tağılğan ğayıpläwlärne kire qağa häm “bu bezneñ konkurent firmanıñ häm anıñ mänfägat'lären yaqlawçı iminlek orğannarınıñ berlektäge xösetlege, zakaz buyınça baruçı qoyı qazuı”, – dip belderä. Ägär Osqar Qaybışewnıñ ğayıbe Yuğarı mäxkämädä raslansa, aña 10 yıllıq törmä cäzası yanıy.

Akademik Qaybışevnıñ üze belän elemtägä kerü mömkin bulmadı. Fatirlarına şaltıratqaç, anıñ tormış iptäşe Ğalina Qaybışeva mäxkämä utırışlarınıñ kiläse atnada da däwam itäçägen äytte. Anıñ süzlärençä, Osqar Kaybıyşevka qarata tağılğan ğayıpläwlär çip-çista uydırma. Ägär xoquq oyışmaları bu eştä döreslekne tabarğa tırışsa, Qaybışevnıñ ğayıpsez buluı isbat iteläçäk. “Ämma xoquq oyışmaları Qaybışevnıñ niçek kenä bulsa da ğayıple ikänlegen isbatlarğa omtıla kebek, - di Ğalina Qaybışewa, - İrem eşlägän institutta barlığı 150 keşe ştatta tora. Şularnıñ yartısı çamasın şahitlar itep çaqıra Yuğarı mäxkämä. Osqar Qaybışevnıñ eşe buyınça mäxkämä utırışları tağın berniçä ayğa suzılırğa mömkin. Anıñ nindi näticä çığaraçağın älegä berkem dä kisterep kenä äytä almıy.

XS
SM
MD
LG