Accessibility links

якшәмбе, 4 декабрь 2016, Казан вакыты 00:58

Yekaterinbur: “Yaratqan moñnar” tatar cırı bäygese bulıp uzdı


Bu könnärdä Yekaterinburg şähärendä “Yaratqan moñnar” isemle tatar cırın başqaruçılar konkursı bulıp uzdı. Bu ideyäneñ avtorı häm proyektnıñ citäkçese Sverdlovski ölkäse mädäniät ministrlığı qaramağında küp yıllar buyı eşlägän kürenekle mädäniät eşleklese Lyutsiä xanım Rezvanova buldı. Sverdlovski ölkäsendä uzdırılğan iñ berençe “Yaratqan moñnar” isemle tatar cırı konkursı monnan näq unbiş yıl elek, 1991нче yılda bulğan. Bu yılğı konkursnıñ maqsatı älege tügäräk datanı bilgeläp ütü genä tügel, ä bälki yañadan üsep çıqqan talantlarnı barlaw, yäşlärne milli tormışqa, mädäniätqa tartu, tatar cırın yäşlär arasında populyarlaştıru.

Konkursta qatnaşuçı yäş cırçılarnıñ çığışın kürenekle sänğät ostalarınnan torğan wäqälätle jyuri bäyäläde. Alar arasında Tatarstan respublikasınıñ- atqazanğan mädäniät xezmätkäre, Rossiä töbäkläre belän eşläw buyınça respublika fänni-metodik üzägeneñ baş belgeçe İlgiz Kadıyyrov, kürenekle kompozitor, Tatarstannıñ atqazanğan sänğät eşleklese Rif Ğataullin, Rossiäneñ atqazanğan mädäniät xezmätkäre, Ural däwlät konservatoriäse aspiranturası mödire İrina Grankovskaya, Tatarstannıñ atqazanğan artistı Marat Qanafin bar ide. Şunısı qızıq, İlgiz Kadıyrov belän Rif Ğataullin monnan unbiş yıl elek uzdırılğan iñ berençe konkursta da eşlägännär bulıp çıqtı. İlgiz abıy ul waqıtlarnı iskä töşerep, bolay dide: - “Ul waqıtlarda andıy konkurslarnıñ iñ berençese Ul'yanda, ikençese Sverlauda ütte. Bik yaratıp, söyenep eşli torğan idek. Xäzer dä söyenep kildek. Ural, Seber yaqları mädäniätneñ alğa kitüe, tatar canlı keşelärneñ küp buluı belän ayırılıp tora. Mondıy festival'lär tağın da däwam itsen ide”.

Jüri äğzası, kompozitor Rif Ğataullin iskä alğança, iñ berençe konkurslar zur bäyräm kebek, şaw-şu belän ütä torğan bulğannar. Xäzer tınıçraq, eşlekle atmosferada uza, di Rif äfände. Elekkege yıllardağı konkurslardan ayırmalı bularaq, biredä yäşlärneñ küp buluı quandıra, dide ul. Bu konkursta anı Näcibä Safinanıñ “Çuqraq belän söyläşü” şiğerenä üze icat itkän cırnı başqarğan, Pervoural'skidan kilgän İlmira Waxitova ğäcäpländergän. “Kompozitor bularaq, min üzemä açış yasadım., - dide ul.

Konkursta qatnaşuçılar arasında nigezdä yäş başqaruçılarnıñ küp buluı, alarnıñ tatar xalıq köylären dä, 70nçe yıllarda populyar bulğan cırlarnı da bik teläp başqaruları ömet tudıra. Jyuri äğzaları bu turıda bilgeläp üttelär. Kiç belän Yuğarı İset mädäniät sarayına küp bulıp xalıq cıyılğan ide. Biredä Ğala-konsert häm ciñüçelärne büläkläw tantanası buldı. Konsert monnan unbiş yıl elek uzdırılğan “Yaratqan moñnar” konkursında iñ berençe lawreat isemen alğan İl'dam Şäripov çığışı belän başlanıp kitte

Bügenge köndä Ural töbägendä yäşäwçe tatar xalqınıñ iñ yaratqan cırçısına äwerelgän, “Yäşlek” ansamble citäkçese İl'dam Şäripov säxnädän yäşlärgä üzeneñ fatixasın birde. Konkursta ul citäklägän ansambl'gä yörüçe dürt yeget häm qız prizlı urınnar aldılar, şularnıñ berse – 19 yäşlek Ruslan Vakasov, üzeneñ bärxet kebek yomşaq tawışı belän äsir itep, gran-pri yaulap aldı.

Konkursta ciñüçelärne qotlap, alarğa istälekle büläklär tapşırdılar. Yekaterinburg şähäreneñ Yuğarı İset rayonı mädäniät häm millätara mönäsäbätlär idäräse citäkçese Marina Borovkova, mondıy çaralarnı yıl sayın oyıştırıp toraçaqların äytep, qatnaşuçılarğa kiläse konkurslarda zur uñışlar teläde.

Fäwiä Safiullina, Yekaterinburg

XS
SM
MD
LG