Accessibility links

сишәмбе, 6 декабрь 2016, Казан вакыты 19:16

Samardağı mäğärif kiñäşmäsen gubernator citäkläde


Samarnıñ Aq yortında zur kiñäşmä uzdı. Gubernator Titov citäkçelegendä uzğan söyläşü mäğärifkä qağılğan ide. Mäktäp direktorları, uqıtuçılar, rayon citäkçeläre, cämäğätçelek wäkilläre öç säğät däwamında ölkädäge uqu- uqıtu mäs’älälären qaradılar. Konstantin Titov alıp barğan söyläşü bügenge mäğärifne milli proyekt bieklegenä kütärüne maqsat itep quyğan ide. Gubernatornıñ qayber fikerläre:

“ Här mäktäptä, yuğarı uqu yortında popeçitel'lär Şurası eşlärgä tieş. Kem dä kem urta xälledän yuğarıraq däräcägä kütärelsä, matdi yaqtan mäktäpkä yärdäm qulın suzarğa tieş. Mäktäpne tämamlap eşquarlıqqa basqan adäm, üz mäktäbenä yärdäm itä başlarğa tieş Bıyılnıñ sentäberennän uqıtuçılarnıñ eş xaqı 8- 10 meñ sumğa citäçäk.”

Samar ölkä mäğärif ministrı Waleri Put'qo çığışınnan:

“ Federal' byudjet mäğärifkä aqçanı 47 % arttırdı. Mäğärif çeltäre tuğız yunäleş buyınça üsäçäk. Alar- klass citäkçelärenä tüläw, eş xaqı artu, sälätle yäşlärne matdi yaqtan qızıqtıru, kampitrlaştıru häm internet çeltären cäyelderü, mäktäplärgä avtobuslar birü, mäktäplärne texnika belän cihazlandıru, berdäm däwlät imtixannarın kertüne däwam itü.

Şunısı quanıçlı ki, Samar ölkäse Rusiä külämendä mäğärif ölkäsendä üzenä kürä ber sınaw mäydanı. Berdäm däwlät imtixannarı da, normativ finanslaw da bezdän başlandı.

Bıyıl yaña mäktäplär salırğa 330 million sum aqça birelä. Ölkädä 384 mäktäp avtobusları, bıyıl tağın 53 avtobus satıp alınaçaq.

Berdäm däwlät imtixannarı kertelgäç, awıllardan yuğarı uqu yortlarına kerü bermä- ber artqan.

Rusiädä 57 balağa ber kampitr turı kilsä, Samar ölkäseneñ awıllarında 16 balağa ber kampitr.

“Rusiäneñ iñ yaxşı mäktäpläre” konkursında Samar ölkäsennän Maslennikov awlı mäktäbe , Samarnıñ 34-nçe mäktäbe häm “Tvorçestvo” mäktäpläre- ciñüçelär. Ä soñğı mäktäp- şäxsi mäktäp.

Samar ölkäseneñ 70 % uquçısı zur uqu üzäklärendä ğilem ala.”

Kiñäşmädä Samar şähäreneñ rektorlar Şurası räise Gennadi Kotel'nikov ütemle çığış yasadı.

Bügen ölkädä 72 yuğarı uqu yortı, 39 filial eşli. Kotel'nikov yuğarı uqu yortları arasında yunäleşenä qarap assotsiälär tözüne qulay sanıy.

Aq yortta mäğärifebezne üsterü yunäleşendä eşlekle fiker alışu uzdı, zalda poplarnıñ utırmawı, çığıp söyläwçelärneñ pravoslav kul'turasın täqrarlamawı da küzgä taşlandı.

Şamil Bahautdin, Samar.

XS
SM
MD
LG