Accessibility links

пәнҗешәмбе, 8 декабрь 2016, Казан вакыты 21:26

Şäymiev xäbärçeläre närsä söyli?


Şuşı könnärdä prezident belän säyäxät itüçe xäbärçelär Mintimer Şäymievnıñ islam illärendäge oçraşuları turında yaña xäbärlär yudırdı. Kuveytta “Sal'wa Sabax Äl Äxmät” üzäge binasında beznekelär iqtisadıy köçebezne täqdir itkännär. Bu çarada zur keşelärdän Tatarstan başlığı Şäymiev, islam eşläre, Kuveyt däwläteneñ yustitsiä ministrı Gabdulla Maatuq Äl'-Maatuq häm başqa wağraq qunaqlar qatnaşqan. Tatarlar äytmeşli; “Allağa şöker!”, Tatarstannıñ çit ilgä barğaç maqtanıp söylärlek; “Tatneft'”ye, “İdeyä” texno parkı, zur aqçalar alğan häm kiläçäktä anı küp tapqırlar arttırıp birergä tieşle “Alabuğa” maxsus iqtisadıy zonası, danı yıraqlarğa taralğan “QAMAZ” zavodı bar. “QAMAZ” zavodları turında söylägännärgä östäp Tatarstanlılar belän islam illäre citäkçeläre häm başqa qunaqlar “Tübän KamaNeftexim”, Qazan borğalaq zavodı kebek ere predpriätieläre xaqında söyläwçe fil'm qarağannar. Mintimer Şäymievçılar söylägännär ğäräplärgä tieşle däräcädä barıp ireşsen häm alar Rusiä belän elemtäne nığraq bäyläsennär öçen der inde Kuveyttağı Rusiä ilçese Azamat Koläxmätov üzeneñ sälämläw çığışında: “Tatarstan – ul tiz häm totrıqlı üsä torğan respublika, tormış eşçänlege ölkälären Auropa standartlarına kertep, üz aldına zur maqsatlar quya torğan töbäk” – digän. Şulay uq Tatarstan başlığınıñ Rusiä öçen kiräkle şäxes buluın da äytep ütkän. Ä menä ğäräplärgä Mintimer Şäymiev citäklägän respublika İslam dinendägelär küp yäşäwe belän qızıqlı ikän. Monıñ şulay ikänen Kuveytnıñ islam eşläre ministrı Maatuq Äl'-Matuqnıñ:“Tatarstan küp möselman yäşi torğan däwlät häm biredä bezneñ illär arasında oxşaşlıq bar”- digän süzlärennän kürergä bula. Ğäräp illärenä säyäxätkä Mintimer Şäymiev üze belän jurnalistlardan alıp ministrlarğa qädär iärtkän. Säwdä häm tışqı iqtisadıy xezmättäşlek ministrı Xafiz Salixov islam illäre eşmäkärläre belän bulğan oçraşuda Kuveyt belän bulğan partnerlıq mönäsäbätläre turında tanıştıra. 2005 yıl näticäläre buyınça Kuveyt belän tawar äyläneşe 15 million dollarğa citkän. Bezdän Kuveytqa çığarıla torğan töp tuarlar – cir transportı, yök avtomobil 'läre häm alarğa cihazlar. Bıltır bu däwlätkä Tatarstannan 684 “QAMAZ” maşinası cibärelgän. 2006 yıl planı buyınça bıyıl 300 avtomobil' cibärergä toralar. Şäymievnıñ Kuveyttağı oçraşuı turındağı älege xäbär Tatarstan başlığı belän säyäxät itüçe jurnalist - Ruslan Möxämmätşin yazmasına tayanıp yazıldı. Çönki Şäymievnıñ säfärläre xaqında tulı itep yazılğan başqa xäbär yuq ide. Röstäm İsxaqi

XS
SM
MD
LG