Accessibility links

якшәмбе, 4 декабрь 2016, Казан вакыты 07:04

Suqırlar cämğiätendä Tuqaynıñ tuuına 120 yıl tuluğa bağışlanğan konsert ütte


Respublikanıñ yustitsiä ministrlıysında terkälgän Qazan şähäreneñ “Suqırlar cämğiäte ” mädäniät yortında Ğ.Tuqaynıñ tuuına 120 yıl tuluğa bağışlap uzdırılğan konsert ike teldä bardı. Konsertta Ğ.Tuqaynıñ süzlärenä yazılğan cırlar başqarıldı, häm anıñ şiğerläre rus häm tatar tellärendä yañğıradı.

Konsertta cırçılar Rimma İbrahimova, İlsur Safin, Gölzadä Safiullina, şağirä Salisä Gäräyeva, İlsöyar İxsanova, Mixail Tuzov, Tatar däwlät gumanitar- pedagogik universitetınıñ muzıkal' fakul'tetı studentçası Al'bina Karmışeva, häm teatr uçilişçesınıñ İldar Xäyrullin citäkçelegendäge “Yäş yöräklär” törkeme çığış yasadılar.

Rossiä häm Tatarstan yazuçılar berlege äğzası Qazan şağire Mixail Tuzov Ğ. Tuqaynıñ şiğerlären tärcemä itkän. Konsert barışında ul alarnı uqıdı. Ä xäzer min annan bu şiğerlärne niçek tärcemä itüen soraşam.

“Miña alarnı başta duslarım yul astı tärcemä buyınça tärcemä itälär. Annan min alarnıñ tatarça yañğıraşın tıñlıym. Şunnan soñ min ul şiğerneñ ritmın , yañğıraşın yuğaltmasqa tırışıp, üzem uylap şiğri qalıpqa salam ”,- dide ul.

Ä xäzer konsertta çığış yasağan cırçı Gölzadä Safiullina söyli:

Suqırlar , küzlelärgä qarağanda, küzläre aşa tügel, matdi baylıq aşa tügel, böten maturlıqnı, böten icatnı alar üz cannarı aşa kiçerälär. Küzlelär ütep tä kitälär , toymıylar da qayberläre mondıy bäyrämnär barlığın. Millät barlığın, millätneñ şundıy böyek şağirlären , şundıy icat keşeläre barlığın suqırlar kübräk belälär häm sizälär”,- dide ul .

Ä xäzer 15 yıl buyı şuşı cämğiättä torğan Zäkiä Xisametdinovanıñ fikeren tıñlağız.

“Bu suqırlar oyışmasına şuşındıy zur konsert belän bezne iskä alıp kilgän artistlarğa , yazuçılarğa, bu konsertnı oyıştıruçı citäkçelärgä, bezneñ arabızda yörüçe Räis Ğabdullinğa zur räxmätebezne belderäbez . Bez bik qänäğät. Bez Tuqaynı elek küz belän uqısaq, xäzer bez anı barmaq belän uqibız. Tuqay bezneñ öçen böyek şağirebez. Monda kergäç bezne öyrättelär Brail' buyınça barmaq belän uqırğa”,- dip Ğ. Tuqaynıñ “İ tuğan tel, i matur tel” dip isemlängän şiğeren uqıp kürsätep, räxmätlären belderde ul.

Mälikä Basıyr, Qazan.

XS
SM
MD
LG