Accessibility links

шимбә, 3 декабрь 2016, Казан вакыты 12:41

Seber awıllarına bağışlanğan konferensiä ütte


30-31 mart könnärendä Omskida “Seber awılları – tarix, bügenge kön häm kiläçäk” dip isemlängän 6-nçı Xalıq-ara fänni-gämäli konferensiä bulıp uzdı. Anda Rusiäneñ 15 şähärennän, Pol'şa, Litva häm Qazaqstan illärennän 400-dän artıq delegat qatnaştı. Çığış yasawçılar törle däräcälärdäge ğalimnär häm aspirantlar buldı. Alarnıñ çığışlarında könbatış Seberdän könçığış Seber kiñleklärenä qädär urnaşqan awıllarnıñ tarixı, bügengese, üseş perspektivaları yaqtırtıldı. Notıqlarda tatar awıllarına bağışlanğan temalar da küp buldı. Bu xaqta oyıştıru komitetı räise, akademik Nikolay Tomilov, konferensiädä xalıq mädäniätenä, şul isäptän seber tatarlarına bağışlanğan ayırım seksiä eşli. Omski etnografları arasında seber tatarlarınıñ mädäniäten öyränüçelär şaqtıy, tatarlar tarixı belän şöğellänüçe ğalimnär millätläre belän tatar tügellär, ä barlıq neçkäleklärne belep eş yörtü öçen tel belü zarur, şul säbäple andıy temalarnı tatar millätennän bulğan aspirantlarğa täqdim itäbez,- dip assızıqlap ütte.

Konferensiädä qaralğan häm tatar awıllarına bağışlanğan temalar Seberdä islam dine qabul itelgän çordan alıp bügenge köngä qädär waqıtnı sıydırğan ide. Şundıy temalar belän çığış yasawçılar Omski yuğarı uqu yortları xezmätkärläre häm aspirantları Ruslan Urazaleev, Dinara Bäşirova, Dinara Aytbayıva, Çulpan Äxmätova, Gölçirä Timomeeva, Gölnara Bikbulatova buldılar. Alardan tış Novosibirski, Ufa, Barnawıl şähärlärennän kilgän delegatlar arasında da tatar awılları temasın yaqtırtuçılar buldı. Omski klassik universitetı aspirantı Ruslan Urazaleev xäzerge waqıtta tatar awıllarında telneñ yuğala baruı, rus teleneñ östenlek aluı turında açınıp söyläde.

Äytergä kiräk, tel yuğaltu Seber awıllarında 18-19-nçı ğasırlarda başlanğan. Ul waqıtta tatarlar Seber yağında rus xalqınıñ sanın üsterüdä dä öleş kertkännär. Bu turında konferensiädä Seber avtoyullar akademiäse xezmätkäre Anatoliy Krix söyläde. Yasaq tüläwneñ kimräk buluına qızığıp küp kenä tatarlar xristian dinen qabul itkännär häm rus isemnäre alğannar. Ğädättä andıylar rus awıllarına da küçep kitä torğan bulğannar. Xristian dinen qabul itüçelär üzläre dä, alarnıñ balaları da ruslar bulıp yazılğannar, älbättä alarnıñ tuğan telläre dä tiz arada ontılıp yuqqa çıqqan. Ämma andıylar artıq küp bulmağan häm keräşennär digän etnik törkemne kiterep çığarmağan dip söyläde Krix efände.

XS
SM
MD
LG