Omski ölkäse tatarları öçen näşer itelä torğan “Tatar dönyası” gazetasınıñ çirattağı 20-nçe sanı dönya kürde. Gazetanıñ bu basmasında , aldağı sannardağı kebek, ölkädä bulıp uzğan mädäni çaralarnı yaqtırtqan mäqälälär basılğan. “Kem yärdäm itär?” digän baş astında tatar xäräkäte aktivistı Fäğilä Çumarovanıñ ölkä radiosında çıqqan “Säläm” tapşıruınıñ yabıluı häm ölkä tatar milli mädäni möxtariätenä arendağa bina qabat birelmäwe öçen borçıluın belderep yazğan xatı urnaştırılğan.
Annan tış gazetada söyekle şağirebez Ğabdulla Tuqaynıñ häm kürenekle ädibebez Fatix Ämirxannıñ tuuına 120 yıl tulu uñayınnan, alarnıñ tormış häm icat yulları turında mäqälälär birelgän. Dini säxifädä şamail'lär, dini bäyrämnär, balalarğa moselman isemnäre quşu turında yazmalar basılğan. Soñğı bittä Rusiäneñ häm Tatarstannıñ xalıq artistı Renat İbrahimov belän äñgämä, Omskida bulaçaq tatar konsertları turında iğlannar, tantanalı datalar häm tuğan könnär belän täbrikläwlär urnaştırılğan.
Gazetanıñ bu sanına ber yañalıq ta kertelgän. Anda uquçılar täqdime buyınça tuğan yaqları, awılları, awıldaşları xaqında yazılğan mäqälälärgä konkurs iğlan itelgän. Bu yünäleştä eş inde başlanıp ta kitkän. Küptörle eşläre belän üz rayonında ğına tügel, ölkä külämendä dä tanılğan Ülänkül mäktäbeneñ 5-nçe – 11-nçe sıynıf uquçılarınıñ awıl ölkännäre turında yazğan yazmaları basılğan. Mäqälälär fotoräsemnär belän bizälgän. Äytergä kiräk, ğädättä açı suğış yılları, tıldağı awırlıqlar turında ul yıllarda yäşägän ölkännär üzläre yaza idelär. Biredä basılğan mäqälälärneñ avtorları – balalar. Uquçılar üzläreneñ äbi-babaylarınıñ yazmışı, alarnıñ kürgännäre häm kiçergännäre turında mawıqtırğıç xikäyä räweşendä yazğannar. Bu sanda, yaña açılğan “Keşe yazmışı” digän säxifädä, şundıy 7 yazma urnaştırılğan.
Şunı da iskä töşerep ütärgä kiräk, Omskida gazeta haman da tatar aktivistları köçe belän ictimaği räweştä eşmäkär Tamir Alimbaev isäbenä çığarıla. Şul uq iğanaçe isäbenä aldan cıyılğan isemleklär buyınça poçta xezmäte aşa ölkädä yäşäwçe tatar xalqına taratıla. Bilgele ki, gazeta eşläwçelärdän küp köç, tırışlıq häm maxsus belem tälap itä. Yäşeren tügel, Tatarstannan yıraq töbäklärdä maxsus belemle tatar jurnalistları yuq däräcädä. Gazetanı näşer itü eşe belän asılda millät yazmışına bitaraf bulmağan keşelär şöğellänä. Älbättä, seber yağında - Omski, Novosibirski, Krasnoyarski, Tomsk, Barnawl häm başqa şähärlärdä çıqqan gazetalarınıñ sıyfatı törleçä. Küptän tügel Qazanda uzğan uqıtuçılar qorıltayına küp kenä delegatlar üzlärendä çıqqan gazetalarnı alıp kilgännär. Alar gazetalarğa qarata üzara fiker alışıp, analiz da yasağannar. Qorıltayda bulğan Omskida näşer itelä torğan “Tatar dönyası” gazetasınıñ baş redaktorı wazifasın ütäwçe Gölsinä Äxmärova “ Bezneñ gazeta başqa töbäklärneke belän çağıştırğanda, naçar tügel. Bezdä tatar telendä yazmalar küp. Qızğanıçqa qarşı, qayber basmalar rus telendä genä çığa ikän, cirle materiallar da az.. Ä, cirle gazeta bulğaç, anda bez üz keşelärebez, üz eşlärebez, üz awıllarıbız turında yazarğa tieşbez. Min şulay uylıym”,- dip söyläde.
Şulay, milli canlı keşelär tırışlığı häm iğanäçe yärdäme belän näşer itelä Seber yağı şähärlärendä tatar gazetaları. Gazetada eşläwçelärneñ häm iğanaçelärneñ kiläçäktä dä mömkinlekläre bulırmı? Bu eş tuqtalmasmı, çılbır özelmäsme? Bügen bu sorawlarğa tögäl cawap birüe dä qıyın. Härxäldä, bu eş tuqtalmas dip, ömetlänäse kilä.
Saniä Mirxaleeva, Omski.
