Accessibility links

дүшәмбе, 5 декабрь 2016, Казан вакыты 15:41

7 April – Sälämätlek köne uñayınnan Paqstan tabibı Fazal Äxtär xätiräläre


7 April comğa könne dönyada Sälämätlek köne bilgelänä. Berläşkän Millätlär Oyışması bıyıl anı tabiplarğa bağışlıy. Här könnären başqalarnıñ ğömeren saqlawğa, yärdäm itügä bağışlağan bu fidäqär keşelär yış qına xezmätlären bik awır şartarda kürsätergä mäcbür. Sälämätlek köne uñayınnan xäzer sezgä Paqstan tabibı Fazal Äxtär xätirälären täqdim itäbez. Uzğan yılnıñ üktäberendä bulğan cir teträwennän soñ ul qaza urınına barıp qorbannarğa berençe yärdäm kürsätkän.

"Ul zilzilä başta miña keçkenä bulıp toyıldı, läkin soñnan bez zur töbäktä küp keşe ülgänen añladıq. Törkiä häm Ärmänastan zilziläläre waqıtına su qıtlığı säbäple küp keşedä böyer awıruları başlanuın belä idek. Yasalma böyer cixazların, bar närsäne tutıra başladıq. Törkemdä 25 keşe ide – tabiplar, şäfqät tutaşları, härkem. Başta xökümättän yärdäm sorap qaradıq, läkin soñnan üz aqçabızğa biletlar alıp kittek. Üktäberneñ 10nda töştän soñ Abbottabatqa cittek.

Binalarnıñ kübese cimerelgän ide. Keşelär çatırlarda yata ide. Paqstanlılarda keşe ülsä qıçqırıp yılaw ğädäte bar. Bu keşelär tınıç qına şok xälätendä utıra ide. İkençe teträndergän närsä – xatın-qızlar, balalar az ide. Cir teträwe irtänge 9lar tiräsendä bulğanğa kürä, irlär tışta, ä menä xatın-qız, balalarnıñ kübese öylärendä bulğan, häm häläk bulğan.

Cir teträwlär xastaxanägä kilgäç tä däwam itte. Andağı keşelär bik qırıqtı, qıçqırışa başladılar. Awırular yataqlarda yata, alarnıñ tuğannarı bu yataqlarnı etep tışqa çığara başladı. Min yasalma böyer cixazın urnaştırdım, 7-8 patsient bar ide, täwlek buyına alar yanında buldım. Min alarğa, ägär sezgä berär närsä bula qalsa, min sezneñ belän üläçäkmen, didem.

Bik nıq arıttı, citmäsä, Ramazan ayı, uraza totarğa da kiräk. Şöker, keşelär bik yärdämçel ide, awız açarğa bezgä aş kiterdelär.

20 yäşlek ber yeget bar ide, Mozaffarabad universitetı studentı. Cir teträgändä öyendä bulğan, taşlar arasına qısılıp qalğan, ike ayağı da sınğan. Ätise anı berniçä çaqırım arqasına salıp xastaxanägä alıp kilde. Başta anı Abotabatta däwaladıq, ike atnadan başqa aıwrular belän bergä Karaçiğa kiterdek. Xäzer ul ayağına basqan, berniçä atna elek kenä şaltırattı.

Min ike yıl ğäskärdä eşlädem. Läkin mondıy xällärne kürgänem bulmadı. Bu tämam başqa täcribä, min anda bulıp, kemneñder tormışın saqlap qala aluıma bik şatmın."

Bu uzğan yılnıñ üktäberendä Paqstandağı cir teträwe qorbannarın däwalağan tabip, Karaçinıñ Urologiä häm yasalma böyer institutı doktorı Fazal Äxtär xätiräläre buldı.

ali ğilmi
XS
SM
MD
LG