Accessibility links

Кайнар хәбәр

Tatar yazuçısına tatnet qarañğı


Tatarstanda bıyıl mädäniät häm sänğät yılı itep iğlan itelgänlege xaqında bik küp söylilär. Matur- matur, zur çaralar da uza. Bu çaralar waqıtında yaqtırtılıp ta barıla. Şul isäptän internettağı gäzitlärdä dä, säxifälärdä dä, mäğlümat agentlıkları tasmalarında da. Tatarça da, qaywaqıt başqa çit tellärdä dä , nigezdä urısça. Bu añlaşıla, urıs internetı bik kiñ qullanıla. Läkin, ul çaralar turında ğına tügel, mäsälän, Musa Cälilneñ üzeneñ äsärlären, yäki Ğabdulla Tuqaynıñ şiğerlären dä uqıp qarıym äle dip internetqa kersäñ, tabuları ay-hay qıyın. Alar bar älbättä. Läkin törlese törle säxifälärdä taralğan. Häm, nigezdä urıs telendä. Tatarstannıñ bügenge yözen Rubin futbol klubı bilgeli dilär räsmilär, tağın Aq Bars xokkey komandası, KAMAZ zavodı häm şunıñ işçe zur şirkätlär. Bu yılda, mädäniätne dä, ayırım alğanda tatar mädäniäte dä Tatarstannıñ yözen bilgelärgä tieş digän fikerlär dä yış işetelä. Rubin, Aq Bars, KAMAZlar säxifäse bar. Musa Cälil, Tuqaylar yuq. Mäsälän, böten urıs telendäge ädäbi äsärlärne, tärcemä bulsınmı ul, urıs yazuçısınıqımı- anı lib.ru säxifäsennän uqıp bula. Anda, Musa Cälilneñ dä şiğerlären urısça da tabıp bula. Tuqaynıqın da, urısça qayber başqa säxifälärdä uqıp bulsa, tatar telendäge berniçä şiğeren kitapxanä.at.tt säxifäsendä uqıp bula. Cämäğät başlanğıçında tözelgän kitapxanä.at.tt säxifäsendä tatarnıñ başqa qäläm iäläreneñ ädäbi äsärlären dä tatarça uqırğa bula. Läkin, ber-ikeşär ürnäk. Bu , tınğısız tatar canlı keşelärneñ eş näticäläre. Yarar, Musa belän Ğabdulla bu dönyadan kitkän keşelär, alar üzlären üzläre qayğırta almıy. Tatmediä kebek agentlıqlarnıñ rayon gäzitlärenä aqça bülep utıru kebek eşläre bik küp. İnde xäzerge tatar yazuçıların qarap çığıyq. Kemnär, bötendönya çeltärenä kergän. Yäğni, dönyanıñ telägän poçmağınnan torıp, qaysı tatar balası, mäsälän xäzerge berär tatar şağireneñ şiğeren kompyuter- sanaq aşa uqıy ala. Urıslarnıqın uqu problem tügel. Alarnıñ internetta ğına bulğan ayırım jurnalları, säxifäläre bua buarlıq.

Tatarlardan bügenge köndä Robert Miñnullinnıñ minnullin.ru dip atalğan säxifäse bar. Ul, kitapçıq kebek eşlängän. Keräseñ, mäsälän, biografiä digän cirgä basasıñ, anıñ tormış yulın tatarça uqıp bula. Şulay uq, icat digän töymägä bassañ, räxätlänep şiğerlären uqı, tatarça. Ufada yäşäp icat itüçe Marat Käbirovnıñ internetta säxifäse ike teldä eşlängän. Ul, maratkabirov.narod.ru adresında urnaşqan. Ğädel Mäxmüt dip atalğan urıs telle yazuçınıñ gabdel.ru dip atalğan urısça säxifäse bar. Ul üzen tatar yazuçısı itep sanıy. Şunıñ belän şul diärgä bula. Elek, Tufan Miñnullinnıñ tufan.da.ru adresında säxifäse urnaşqan ide. Xäzer ul säxifä eşlämi. Şulay itep, tatar yazuçılarınıñ , bügen inde kibetlärdä internet bulmasa ikmäk tä satıp alıp bulmağan zamanda, internetta üz säxifäläre yuq. Älbättä, internetta säxifälär buldırır öçen, yazuçılar üzläre berençe eş başlarğa tieş.

Ä däwlät, bu eşne başlap qaradı. İntertat dip atalğan Tatarstan elektron, yäğni internettağı gäzite, tatar ädäbiäte kitapxanäsen internetta buldıru eşen başlağan ide. İnde ike yıl uzdı, säxifä yuq äle.

Qazan utları kebek sallı jurnal da, başqa tatar matbuğatlarınnan ayırmalı bularaq, üz säxifäsen buldırırğa aşıqmıy. Tatar balası, internetqa kergän tatar uquçısı, zamança yäşägän tatar uğlanı älegä urısça ğına, annan-monnan tabıp Musa Cälilne dä, Tuqaynı da, Xäsän Tufannı da barı tik urısça ğına uqıy ala.

Älegä menä şular. Bu tatnet tapşıruı buldı. Anı Räfis Cämdixan äzerläde.

XS
SM
MD
LG