Accessibility links

Кайнар хәбәр

Tatnet bäygesendä kön sayın ğariza kilä


Tatar internetı 2006 bäygese ber atna elek, 1 aprel'dä iğlan itelde. Älege bäyge inde dürt yıl rättän oyıştırılıp kilenä. Baştaraq ul, ictimaği başlanğıçta barğan bulsa, soñraq, oyıştıruçılar anı däwlät, bu oçraqta Tatarstan yärdäme belän uzdıra başladı. Anda, tatarlarğa yäki tatarstanğa qağılışlı internet säxifäläre qatnaşa ala. Nominatsiälär küp törle. Bıyıl 12. Şularnıñ dürtese tatar telendä. Az dimägez. Bıltır, ğomumän, ike genä nominatsiä tatar telle säxifälär öçen ide. Çexiä tatarlarına bağışlanğan tatar telle säxifä, bıltır, tatar internetı bäygesendä tatar telle bulğanı öçen qatnaşa da almadı. Bıyıl, mondıy, töbäk säxifäläre tatarça bulsalar da qatnaşa alalar. Bäygeneñ oeştıru komitetı räise Aynur Sibğätullin, Azatlıqqa, tatnet bäygesendäge tatar telle säxifälärenä mä’säläsenä qarata fikeren yazıp cibärde. Älbättä internet aşa. Aynur Sibğätullin fikerençä, Qazaqstanda şundıy uq internet bäygedä, 20 nominatsiädän barı tik ber genä nominatsiä qazax telendä. Üzbäkstanda uza torğan üzbäk internetı bäygesendä 14 nominatsiäneñ şulay uq berse genä milli teldä. Ä bezdä 12 nominatsiäneñ 4 se tatar telendä. Böten problema, dip yaza Aynur Sibğätullin, şunda ki, yaxşı sıyfatta äzerlängän tatarça säxifälär yuq.

Menä şundıy cawap oyıştıruçılardan. Dimäk, tatarlar qayçan sıyfatlı internet säxifä yasıy başlıy, tatar telendä, şul çaqta bäygeneñ nominatsiäläre dä arta barır. Ä kem soñ öyräter, tatar tellelärne tatarça säxifälär yasarğa. Barlarına yärdäm itep, maturlap, üsenderep cibärergä atlığıp toruçılar yuq bit.

Ä bügengä, inde 19 säxifä tatnet 2006 bäygesendä qatnaşu telägen beldergän. 14 urıs telendä, 5 tatar telendä.

XS
SM
MD
LG