Accessibility links

шимбә, 3 декабрь 2016, Казан вакыты 03:28

Ufadağı tatar gimnaziäse tözeleşen yaqlaw däwam itä


Ufada tatar gimnaziäse öçen dip tözelüçe binanı yaqlap çirattağı piket bulıp ütte. Bu bina tiräsendä tiräsendä tartqalaş haman da däwam itä. Elegräk tä xäbär itelüençä, Başqortstandağı kiñ bilgele tatar eşquarı häm cämäğät eşleklese Ramil Bignov berniçä yıl elek üz şirkäte öçen tözetä başlağan bina tözeleşen tatar gimnaziäse itep tözep beterergä qarar itkän ide. Ämma Ufa şähäre xakimiätläre bu tözeleşkä qarşı çıqtı häm inde 4 qatı tözelep betkän häm 20 million sum aqça totınğan şuşı binanı Arbitraj mäxkämä qararı belän, cimerergä bulğan ide. Xäzer tatar milli oyışmaları bu binanı cimertmäs öçen, milli xäräkät aktivistları belän täwlek äylänäse dejur torunı oyıştırdı.



Atnakiç könne Başqortstan tatar oyışmaları wäkilläre, tatar gimnaziäse tözeleşen saqlap qalunı taläp itep, Ufa şähäre xakimiäte qarşında piket ütkärde. Uram cıyınında qatnaşuçılar törle şiğar''lär totqan ide. Alar başqala xakimiätlärenä möräcäğät itep, tatar gimnaziäse tözeleşen tämamlatu mömkinlegen häm tatar balalarına üz ana tellärendä belem alu xoquqın birüne taläp itte.

Başqortstan Tatar Milli-mädäni moxtariäte räise urınbasarı, professor Mäcit Xucin süzlärençä, şundıy uq piket tağın 12 aprel'' könne dä ütäçäk. Näq şul könne Ufa şähäre xakimiäte oyıştırğan tikşerü komissiäse tatar gimnaziäse öçen tapşırılğan bina tözeleşen qararğa kilergä tieş ikän. Şulay itep, bu bäxäsle bina tiräsendäge xällärgä kiläse atnada berniqädär açıqlıq kerergä dä mömkin.



Ufa şähäre türäläre tatar gimnaziäse öçen dip tapşırılğan binanı tözetügä qarşı çığunı iñ başta Ufada tatar gimnaziäläre citärlek dip añlatqan ide. Annan soñ bu bina tieşle dokumentlar räsmiläşterelmiçä tözelä, digän säbäpne çığardılar. Xäzer inde bu bina gimnaziä itep tözü öçen gigiena taläplärenä cawap birmi digän sıltaw da östälde.

XS
SM
MD
LG