Accessibility links

шимбә, 10 декабрь 2016, Казан вакыты 13:58

Çittän kilgän studentnıñ sälämätlege kem qulında?


Çit töbäklärdän Tatarstanğa uqırğa kilgän yäşlärneñ problemaları sanap betergesez küp bula. Uqırğa kerü, toraq mäs’äläse - şularnıñ iñ möhime, älbättä. Ämma şunıñ belän başqa töbäktän kilgän bala-çağanıñ “baş awırtuı” betmi äle. Tağın ber möhim mäs'älä - meditsina yärdämen alu. Awırıp kitkän student qaya barırğa, niçek däwalanırğa tieş? Äye, monıñ öçen maxsus studentlar şifaxanäse bar. Ämma awıru qatlawlı bulğan çaqta, yañadan-yaña analizlar birergä kiräk bulsa, studentlar şifaxanäse ğına yärdäm itä almıy. Bu oçraqta tabiplar studentqa yullama tottırıp, anı respublika xastaxanäsenä cibärä. Anda isä Tatarstan polisı bulmağan studentqa barı tik tüläwle yärdäm täqdim itälär. Başqortstannıñ Tuymazı şähärennän kilep, Qazan däwlät finans iqtisat institutında belem aluçı Rezidä isemle qız belän dä näq şulay bulğan. Rezidäne üzen tıñlıyq:

Awırıp kittem dä, şifaxanägä bardım. Annan mine respublika xastaxanäsenä analizlar birergä cibärdelär. Anda isä Tatarstan polisı bulmağaç, mine buşlay qabul itmädelär. Polisnı alıştırırğa kiräk didelär. Başqortstan polisın qayda alıştırırğa da min belmim, berkem dä andıy mäğlümatnı birmäde. Menä xäzer min bik awırıym. Ämma polis bulmağaç, berkem dä yärdäm itä almıy.

Bilgele, 800 sumlıq analizlarnı student qına tügel, ä eşlägän keşegä dä kütärüe bik ciñel tügel. Ä Tatarstan polisın alu öçen Tatarstanda terkälü kiräk. Tik çittän kilep, äle berençe kursta ğına uquçı Rezidäneñ Tatarstan propiskası bulmasa, dimäk ul respublikadağı meditsina yärdämenä ömetlänä almıy bulıp çığa. Ämma Tatarstannıñ mäcbüri meditsina iminiät waqife belgeçe äytüençä, respublikada waqıtlıça terkälgän häm üz töbäktäge polisı bulğan studentlar Tatarstan xastaxanäsendä yärdäm alırğa xoquqlı. Anıñ belderüençä, şul räweşle çittän kilgän här student ta Tatarstanda däwalana ala. Ä Qazan däwlät finans iqtisat institutında belem aluçı Wäliullina Rezidägä monı añlatuçılar tabılmağan inde. Respublikanıñ mäcbüri meditsina iminiät waqife belgeçe bu barı tik xastaxanädä eşläwçe şäfqät tutaşlarınıñ belemsezlege arqasında bulğan dide.

Al'bina Zäynulla

XS
SM
MD
LG