Accessibility links

шимбә, 10 декабрь 2016, Казан вакыты 06:12

Tatar telendä berençe muzıkal'' fil''m töşerelde


Tatar telendä berençe “Ätäçsez irtä ni kiterä?..” dip isemlängän muzıkal' fil'm rejisser Ğasıym Şir-Ğazi citäklägän “Bars-Media” prodyuserlıq üzägendä eşlängän. 20 dän artıq populyar tatar artistları qatnaşındağı älege fil'm Saba rayonı Olı häm Keçe Şıñar awıllarında 2005 yılnıñ avgustında ike atna däwamında töşerelgän. Fil'm qarawçılarına, tanış cırçılarnı kötüçe, umartaçı, sıyır sawuçı, traktorçı h.b. awıl keşeläre obrazında kürü bik qızıqlı bulaçağın faraz itä oyıştıruçılar. Äytik, Kolxoz räise – Rawil Galiev, Soldat – Färit Taişev, soldatnıñ änise – Zilä Sönğatullina, Kötüçe – Bulat Niğmätullin, Ölkän sıyır sawuçı – Dilä Niğmätullina, Traktorçı qızlar – “Zö-Läy-Lä” triosı, Fel'dşer – Landış Nigmätcanova.

“Bars – Rekords”nıñ cämäğätçelek belän eşläw bülege citäkçese İlnar Cihangirov Azatlıqqa älege fil'mnı töşergän waqıtta nindi maqsatlar quyıluı turında bolay dide:

“Bez barıbız da televizordan, radiodan, säxnädän kürep künekkän cırçılarnı bez alarnı yaña obrazda, yaña räweştä kürsätergä tırıştıq. Şunıñ öçen bu tatar kinomotografiäsendä berençe täcribä. Bezneñ maqsatıbız näfis fil'm töşerü tügel ide, ä bez anı ciñel qarala torğan muzıkal' fil'm räweşendä, küñel açu çığanağı bularaq yasadıq.”

Ä fil'mnıñ syujetı mondıyraq. Surätlängän waqiğalar, cäy könne bara. İrtä tañnan armiädän tuğan yağına qaytıp kilüçe soldat (Färit Taişev), awılınıñ tıp-tın yoqlap yatqanına aptırap qala. Uramnarda berkem dä kürenmi, xätta ätäçlär dä qıçqırmıy. Närsä bulğan soñ monda? Ğömerendä berençe tapqır Äsmäbikä äbineñ (Firaya Äkbärova) ätäçe yoqlap qalğan ikän bu könne. Şunıñ belän bäyle räweştä böten närsä tiskäregä kitä. Kötü dä soñğa qalıp çığa... Äsmäbikä äbi käcäsen kötülekkä quğanda, qarşına kolxoz räise (Rawil Galiev) oçrıy häm qaladan konsert quyarğa kilgän cırçını qunarğa kertüen sorıy. Ä ul waqıtta soldat, awılda qalğan yaratqan qızı Läysän Gimaevanıñ kiäwgä çığıp bäbäy kötkänen häm ölkän sıyır sawuçı Dilä Niğmätullinanıñ üzenä qaşıyq bulıp yörgänen belä. Fil'm syujetına “Zö-Läy-Lä” qızlarınıñ traktorların yua-yua mäxäbbäten tabırğa xıyallanuları, kötüçe Bulatnıñ cırçı Mälikägä qaranıp yörgängä fel'dşer Landış Nigmätcanovanıñ yanuları, kiäwdäge qızğa yäşeren ğişqı bulğan kitapxanäçe Bulat Cihanşinnıñ özgälänüläre dä bik yatışlı. Kiç belän böten awıl xalqı klubqa konsertqa cıyıla häm waqiğalar ağışı kötmägän yünäleş ala...

Fil'mnıñ syujetı cırlar belän tığız ürelgän. Anı xätta syujet liniäse belän ber-bersenä bäylängän kliplar törkeme itep tä qarap bula. Fil'mda barısı 23 populyar tatar estrada cırı qullanılğan.

Fil'mda qatnaşqan artistlarnıñ kübese kinoda üz köçlären berençe tapqır sınap qarağan, şuña kürä qayber urınnarda artist ostalığı citmäw, tabiği xäl, dip belderelde matbuğat oçraşuında. “Ätäçsez irtä ni kiterä?..” muzıkal' fil'mı videokassetalarda häm DVD-disklarda dönya küräçäk. Fil'mnıñ ssenariy avtorı Fänis Cihanşin belderüençä inde ikençe tatarça muzıkal' fil'mnıñ ssenariye dä yazğan. Anda isä waqiğa qış köne Qazan şähärendä baraçaq ikän.

Gölnaz Şäyxedin

XS
SM
MD
LG