Accessibility links

шимбә, 3 декабрь 2016, Казан вакыты 18:47

Tatarstan - Yaña ğasır xäräkäte kiläçäk turında uylana


11 aprel’ könne Qazanda uzğan Tatarstan-Yaña ğasır xäräkäte Säyäsi Şurasınıñ çirattağı utırışında anıñ citäkçese Färit Möxämmätşinnıñ çığışı tıñlandı. Tatarstan parlamentı citäkçese respublikadağı säyäsi-ictimaği wazğiät turında söyläde. Şulay uq üzeneñ çığışında ul Tatarstan prezidentı Mintimer Şäymievnıñ respublika Däwlät Şurasına yıllıq yullaması nigezendä xäräkätneñ kiläçäkkä plannarına da tuqtaldı. Plannar arasında yullamada qaralğan eşlär xaqında xalıq arasında añlatu eşlären alıp baru, bügenge köndä ildä aktual’ bulğan ictimaği-säyäsi problemalar xaqında fänni-praktik konferensiälär ütkärü, Tatarstanda däwlät proyektlarınıñ ütäleşen küzätep baru häm başqa şundıy eşlär qaralğan. Däwlät programmaları digändä, Färit Möxämmätşin alarğa bik citdi qararğa kiräk, dide. Häm alarnıñ ütäleşe barıbız üçen dä şul isäptän, Yaña ğasır xäräkäte öçen dä citdi imtixan bulaçaq, digän fiker äytte. Monnan tış Yaña ğasır xäräkäte wäkilläre üzläreneñ internettağı säxifälären yañartıp, ğomumän respublikanıñ mäğlümäti qırında xäräkät xaqında mäğlümätne tulıraq buldırunı maqsat itep quyğannar. Üzeneñ çığışın Möxämmätşin xäzer inde ğädätkä kergänçä, Bez buldırabız dip tämamladı.

Cıyılışnıñ axırında Azatlıq xäbärçese xäräkätneñ Säyäsi Şurası äğzası Rafail Xäkimov belän söyläşte. Tatarstan-Yaña ğasır xäräkäte belän Berdäm Rusiä firkäseneñ mönäsäbätläre turındağı sorawğa Xäkimov menä niçek cawap birde.

Bez şaqtıy möstäqil räweştä, nindider bufer bularaq torabız. Çönki Tatarstannıñ üzençälekläre, mänfäğätläre bar häm alarnı härwaqıtta Berdäm Rusiäneñ respublikadağı bülekçäseneñ eşçänlege belän genä qänäğätländerep bulmıy. Xäyer, bezneñ Berdäm Rusiädä dä şaqtıy köçle lobbi bar – Mintimer Şäymiev, Morozov, Möxämmätşin. Bez şaqtıy närsälärne eşli alabız, läkin qayber mäs’älälär niçekter töşep qalalar. Mäsälän, federalizm. Bu mäs’älälär Tatarstanğa bäyle bulıp qala. Rusiäne unifikatsiäläw mömkin tügel bit, Tatarstan barıber üzençälekle bulıp qala. Bezneñ maqsatıbız – xäräkätneñ yoğıntısın köçäytü. Bu Berdäm Rusiä firkäsenä dä kiräk, çönki bez xalıqqa yaqınraq, bezneñ üzebezneñ bülekçälärebez bar, annarı soñ bez alay uq byurokratiägä çummağan

Şulay itep, 11 aprel’ könne Tatarstan-Yaña ğasır xäräkäte Säyäsi Şurasınıñ çirattağı utırışı ütte. Anda xäräkätne xalıqqa yaqınaytu, anıñ turında mäğlümät taratu kiräklege xaqında äytelde. Çınlap ta, xäräkätneñ bu yünäleştä eşlise eşläre äle bik küp, çönki Yaña ğasır digändä tatarstanlılar yış qına küz allarına Tatarstandağı teleradiokompaniäne kiterälär.

Menä bu xaqta berniçä qazanlı fikere.

- Bu xäräkät turında işetkänem genä bar, ämma anıñ turında täfsilläp äytä almıym. Min säyäsät belän qızıqsınmıym.

- Yañaça yäşäw turında uylana bu xäräkät liderları, minemçä.

- Min bu turıda bik küp närsä beläm. Şunı äytäsem kilä, Tatarstanda häm ğomumän Rusiädä ideyä dä, ideologiä dä yuq. Ä bu xäräkätneñ liderı – minem yaqtaş Färit Möxämmätşin.

- Min ğomumän belmim.

- Andıy xäräkät turında işetkänem dä yuq. Min beläm “Tatarstan – Yaña ğasır” tele-radiokompaniäse bar. Televizor qarıym, gäcit-jurnallar uqıp toram, ämma andıy xäräkät turında berni dä işetkänem yuq.

- Bu xäräkätne min küptän beläm inde. Alarnıñ eşçänlege dürt yıl elek başlanğan. Bu xäräkätne Färit Möxämmätşin citäkli. Xäräkätneñ eşçänlege bezneñ tormışnı yaxşırtuğa bağışlanğan, maqsatları da alarnıñ yaxşı.

- Bu xäräkätneñ “ayular” belän quşıluı miña oşamıy. Här partiäneñ üz fikere bulırğa tieş, xökümät äytkänne genä eşlärgä kiräkmi. Bäysez bulırğa kiräk!

Gölnaz İlgizär, Albina Zäynulla

XS
SM
MD
LG