Accessibility links

шимбә, 10 декабрь 2016, Казан вакыты 12:01

Meditsina professorı narkotik propagandalıy?


Monnan berniçä yıl elek kenä Tatarstanda uzğan zur konferensiädä narkomaniäne däwalaw öçen yaña effektiv daru täqdim ittelär. Metadon dip atalğan şuşı daru turında çit il professorları, törle belgeçlär üz täcribälärenä nigezlänep, maqtıy-maqtıy söylägännär ide. Alar äytüençä, mondıy däwalaw dönyanıñ 60 ilendä, şul isäptä Yevropa berlegeneñ barlıq illärendä dä, Qıtay, İndiä, İranda häm elekke Sovetlar berlegeneñ küp kenä respublikalarında uñışlı ğına qullanıla. Ämma Rusiä älegä qädär bu daruğa bik şiklänep kenä qaradı. Soñınnan isä anı qullanudan ğomumän baş tarttı. Çönki metadon ul üze narkotik matdä. Ä Rusiädä narkomaniäne äf'yun qullanıp däwalaw tıyılğan. Bu ildäge qanunğa qarşı kilä.

Däwlät Duması deputatı Yevgeniy Royzman Qazandağı professornı näq şuşı metadon daruına, ä dimäk narkotikka propaganda eşen alıp baruda ğayıpläde. Meditsina fännäre doktorı, psixik sälämätlekneñ problemaların öyränüçe institut direktorı, Bötendönya sälämätlek oyışması ekspertı Vladimir Mendelewiç internet säxifädä narkomaniäne metadon belän däwalaw ısulın kiñ yaqtırtqan bulğan. Bu xaqta Tatarstannıñ narkologiä dispanserı baş tabibı Färit Fättäxov bolay dide:

Min Mendelewiçnıñ eşe turında berni söyli almıym, ämma metadon turında äytäm. Metadon ul äf'yun. Ä Rusiä qanunnarı buyınça narkomaniäne däwalawda narkotik qullanılmasqa tieş.

Deputat, “Narkotiksıyz şähär” dip atalğan Yekaterinbur fondınıñ elekke prezidentı Royzman Qazan professorı täqdim itkän däwalaw ısulın ildäge qanunğa qarşı kilü-kilmäwen tikşertergä taläp itkän. Anıñ äytüençä, narkotiklar belän köräşüçe küp kenä oyışmalar anıñ bu täqdimen xuplağan. Citmäsä, Latviädä metadon belän däwalaw narkomannar sanın artuğa kitergän ikän.

Monnan soñ Tatarstan prokuraturası tikşerülär uzdırğan. Mendelewiç tikşerüçelärne üze täqdim itkän däwalaw metodikasınıñ narkotik qullanuğa cälep itü ısulı bulmawına ışandıra alğan. Respublika prokurorı Qafil Ämirov – bu fänni bäxäs häm bu eşkä qısılırğa cıyınmawın belderde. Prokuratura professorğa qarata eş quzğatudan baş tartqaç, bu eş belän respublikanıñ narkotiklarnı kontrol'dä totuçı idäräse şöğellänä başlağan. Mendelewiç äytüençä, idärä şunda uq aña eş quzğattırğan. Ämma idärä mayorı Marina Laryuxina “Kommersant” gäzite xäbärçesenä älegä bernindi dä eş quzğatılmağan, tikşerülär bara dip beldergän. Bügenge köndä alıştıru däwasına bağışlanğan internet säxifäse yabılğan. Tikşerülär bara.

Al'bina Zäynulla

XS
SM
MD
LG