Accessibility links

Кайнар хәбәр

Ufada tatar milli-mädäni möxtariäte cıyıla


Şimbä könne Ufada Bötenrusiä Tatar milli-mädäni moxtariäte şurası äğzalarınıñ kiñäytelgän utırışı ütä. Anda Rusiäneñ 22 töbägennän qunaqlar kiläçäk. Qayber wäkillär comğa könne ük kilä başladı Ufağa. Qazannan bu cıyınğa Bötenrusiä Tatar milli-mädäni moxtariäte idäräse citäkçese Rimzil Väliev citäkçelegendäge wäkillek kilä. Başqortstan Tatar milli-mädäni moxtariäte räise Ramil Bignov äytüençä, Ufadağı kiñäytelgän utırışta Başqortstan tatarlarına qağılışlı ike zur mäs''älä tikşerelä. Anıñ berse – respublika tatarlarınıñ könüzäk problemaları bulsa, ikençese – Başqortstan tatar milli-mädäni moxtariäten räsmi terkäw eşläre tiräsendäge qarşılıqlarnı tikşerü. Moñardan tış, çit töbäklärdän kilgän tatar milli-mädäni moxtariätlär citäkçeläreneñ dä çığışları tıñlanaçaq. “Başqa töbäklärdä yäşäwçe millättäşlärebezne borçığan problemalar bik küp, - di Ramil Bignov. – Qaydadır tatar mäktäplären açuğa qarşılıqlar tudırıla, qaydadır tatar milli oyışmaları eşçänlegenä ayaq çalalar, ä qaydadır räsmi xakimiätlär inde tözelep yatuçı mäçetlärne cimertü turında qararlar qabul itep yatalar. Ğomumän, urtağa salıp tikşeräse, fiker alışası mäs''älälär bik küp cıyıldı”. Ufadağı zur cıyınğa äzerlek baytaqtan bardı. Anı ütkärü öçen bina sorap, Başqortstan tatar cämäğätçelek oyışmaları berlege citäkçelege başqaladağı törle mädäniät sarayları direktorlarına möräcäğät itep qarağan. “Ämma bezneñ bu üteneçebezne hämmä cirdä kire qaqtılar, - di Başqortstan Tatar milli-mädäni moxtariäte räise urınbasarı, professor Mäcit Xucin. – Şulay itep bu cıyınnı üzebez härçaq cıyıla torğan qısanraq ber zalda ütkärergä turı kilä. Küñelebez kiñ, Alla boyırsa sıyarbız äle”. “Başqortstan Tatar milli-mädäni moxtariäten haman da Yustitsiä ministrlığında terkätä almıy cäfa çigäbez, - di Mäcit Xucin. – Moña respublika citäkçelege qomaçawlıq itä. Şulay da räsmi terkälü ütü öçen köräş tuqtalmayaçaq”. Sez Başqortstan Tatar milli-mädäni moxtariäte räise urınbasarı, professor Mäcit Xucin fikerlären işettegez. Şulay itep şimbä könne Ufada Bötenrusiä Tatar milli-mädäni moxtariäte şurası äğzalarınıñ kiñäytelgän utırışı ütäçäk. Anda qaralaçaq mäs''älälär millätneñ bügenge köndäge küp problemaların qolaçlıy. İlneñ 22 töbägennän kilgän wäkillär üzlärendä bulğan xäl-waqiğalar turında tulı mäğlümat birer dip kötelä anda.

XS
SM
MD
LG