Accessibility links

дүшәмбе, 5 декабрь 2016, Казан вакыты 17:39

Könbatış xristiannarı Pasxanı bilgeli, yaña Papa üzeneñ berençe "Urbi et Orbi" yullamasın yasadı


Şuşı könnärdä dönya xristiannarı Ğäysä päyğämbärneñ ülelärdän toruın, Pasxa bäyrämen bilgeli. Bu uñaydan Rim papası Benedikt Vaticanda yıllıq "Urbi et Orbi" - "Qalağa wä dönyağa" yullaması belän çıqtı. Papa täxetendä äle berençe yılın ğına tutırğan Benedikt 16-nçı öçen bu anıñ berençe Pasxa yullaması bulıp tora.

Benediktneñ Pasxa yullamasın tıñlaw öçen Vaticannıñ izge Petr mäydanına 100 meñläp keşe cıyılğan ide. Ğäysä päyğämberneñ comğa könne xaçqa qadaqlanıp ülgännän soñ yäkşämbedä ülelärdän toruın bu atnada Könbatış xristiannarı ğına bilgeli, pravoslav dönyasında isä Pasxa kiläse yäkşämbedä bulaçaq. Ämma Papanı ruxi yulbaşçısı itep bar xristiannar sanamasa da, anıñ dönya säyäsätendäge süze şaqtıy abruylı. Şuña da katoliklar başlığı çığışına zur iğtibar birelä, bigräk tä "Urbi et Orbi" yullamasına.

Papa itep saylanğannan birle berençe Pasxa çığışında Benedikt xalıqara cämäğätçelekne, yaqın Könçığıştağı solıxnı nığıtu maqsatında İran belän aralaşuğa öndäde. "Atom qüwätenä ireşü tiräsendäge xalıqara krizislarğa kilgändä, citdi wä ixlas söyläşülär aşa bar taraflarnı da qänäğätländererlek märtäbäle çişeleş tabılsın ide", digän ömet belderä Rim papası.

Benedikt şulay uq İzrailneñ dä tınıçlıqta yäşäw xoquqın yaqlap çıqtı, ämma berük waqıtta dönya xäzer ömetsezlektä yäşägän fälästin xalqına da şul wäzğiattän qotılıp üz däwläte bulğan kiläçägen qoruğa yardäm itsä ide", dip belderde.

Rim papası çığışında terror qurqınıçın beterü öndämäse dä bar ide. Bu uñaydan ul dönya citäkçelären, xalıqara oyışma başlıqların törle rasalar, dinnär, millätlär wä mädäniatlär arasında tatulıqqa ireşü öçen bergäşläşep eşläwgä çaqırdı.

Yäkşämbedä qarşı töndä Benedikt 16-nçı Vaticandağı izge Petr çirkäwendä tönge uyawlıq ğibadäten ütkärde. Anda ul Ğäysä päyğämberneñ yaqınça ike meñ yıl elek ülelärdän toruın "bötenläy yaña ber ülçämgä küçü" dip atadı häm üz dindarların dönyanı köç qullanu wä aqçağa xireslänüdän qotqarıp, näq şundıy uq yaña ülçämgä, yaña xälätkä küçärgä öndäde.

Ğäysäneñ tuğan cire sanalğan Bäyetlähem şähärendä, ul Ürdün yılğasınıñ könbatış yarında urnaşqan, cirle katolilar uyawlıq ğibadäten Rıştua çirkäwendä ütkärde. Bu çirkäw Ğäysä tuğan mäğärä östendä urnaşqan.

Uzğan yılda Paxsa bäyräme inde märxüm papa İoann Paul ikençeneñ sälämätlege naçarayu külägäsendä ütkän ide. İzge Petr mäydanında cıyılğan xalıqqa ul barı tik berniçä genä süz äytä aldı, häm ozaq ta ütmäde aprilneñ 2-sendä wafat buldı.

Pasxa bäyrämeneñ xristian dönyasındağı ähämiaten iskä alıp Filippin prezidentı Gloria Macapagal Arroyo maxsus färman çığarıp, ilendäge ülem cäzasına xökem itelgän 1200-läp keşeneñ şul cäzasın ügärtte.

İdel-Uraldağı pravoslavlar bügen Ğäysäneñ Yirusalimgä kilüe könen - tiräk yäkşämbesen bilgeli.

Kärim Kamal
XS
SM
MD
LG