Accessibility links

чәршәмбе, 7 декабрь 2016, Казан вакыты 19:25

Qazannıñ iske tatar ziratında Ğ.Tuqaynıñ qäberenä çäçäklär saldılar.


Yıl sayın aprel'neñ 15 könendä Ğ.Tuqay wafat bulğan köndä, Qazan zıyalıları tatar ziratına barıp anıñ qäberenä çäçäklär salalar.

Ä bu şimbä könne Tuqaynı iskä alu öçen ziratqa şağirlär, yazuçılar, din ähelläre dä, Ğ.Kamal teatrı artistları da , häm ğomumän, anda cıyılğan xalıq barlığı 200 dän artıq ide.

İskä alu yolasın Ğ. Tuqay fondı citäkçese , professor Xatip Miñnegulov açtı häm alıp bardı. TR Premyer- ministr urınbasarı, mädäniät ministrı Zilä Wälieva üzeneñ çığışında :

Aprel' ayınıñ şuşı könnärendä “Ğ.Tuqaynı iskä alu könnäre” Avstraliädä dä , Törkiädä dä uzuı turında äytte. Häm Amerikada yäşägän tatarlarnıñ da anı iskä alu xörmätennän, şağirneñ şiğerlären uqu, anıñ qulyazmaların jurnallarda bastıruların belderde.

Häm şulay Premyer- ministr urınbasarı, aldağı könnärdä Ğ. Tuqaynıñ 125 yıllığına anıñ belän bäyle istälekle urınnarnı xalıq küñelendä yañartunı, Ğ. Tuqaynıñ 5 tomlığın çığarunı xästärläwläre turında äytte.

Şağirlärdän Şäwkät Ğäliev, Robert Äxmätcan , Robert Miñnullin, Luara Şakircan häm başqalar qatnaştı. Ğ. Tuqaynı iskä alu yolasında anıñ ruxına bağışlap doğa qılındı. Häm Ğ. Tuqaynı iskä alırğa kilgän här keşe anıñ qäberenä çäçäklär saldı.

Böyek Britaniä däwläteneñ mädäniät ministrlığında grantlar birü buyınça ekspertı Roger Mc Cann da tärcemäçe yärdämendä çığış yasadı. Ul Ğ. Tuqay turında işetep belüen, häm üzeneñ anıñ turında tağın da kübräk beläse kilüen belderde. Monda cıyılğan хalıqnıñ küp buluı, häm şulay uq balalarnıñ da buluı turında ul :“ Bu tantanada qatnaşu minem öçen dä bik dulqınlandırğıç mizgel !- dide Roger Mc Cann.

Roger McCann jurnalistlarğa Tatarstanğa üzeneñ nindi maqsat belän kilüen dä belderde.Ul, Böyek Britaniäneñ iñ yaxşı säxnälärendä kürsätü öçen , Ğ.Kamal teatrı quyaçaq spektakl'lärne qarap, saylap alırğa kilgän. Anıñ äytüe buyınça, ul inde 4 qarağan, tağın äle 2 spektaklen qarayaçaq ikän.

Mälikä Basıyr, Qazan.

XS
SM
MD
LG