Accessibility links

шимбә, 3 декабрь 2016, Казан вакыты 05:42

Milli-mädäni möxtäriät şurası utırışı buldı


15 aprel' Ufada milli-mädäni möxtäriät şurası utırışı bulıp ütte. Ul Rusiä tatarlarınıñ federal' häm Başqortstan tatarlarınıñ milli-mädäni möxtäriätläre şuralarınıñ urtaq utırışı buldı. Utırışta Rusiä tatarları milli-mädäni möxtäriäte räise Rimzil Väliev, oyışmanıñ räistäşe Färit Urazaev, ilneñ törle töbäklärennän kilgän möxtäriät şurası äğzaları qatnaştı.

Başqortstan tatarları milli-mädäni möxtäriäte şurası utırışında respublikadağı tatar milli-mädäni problemaları, mäğärif turında süz bardı. Oyışmanıñ haman da bulsa terkälä almawına borçılu belderelde. Çınnan da, 2004 yılnıñ 27 noyäberyendä tözelgän oyışma haman da bulsa terkälmägän. Anı terkäw öçen Rusiäneñ Yustitsiä ministrlığına möräcäğät itü turında qarar qabul itelde. Qararda şulay uq tel statusı, mäğärif, televidenie häm radiodağı efir waqıtların arttıru häm başqa küp kenä mäs'älälär kertelde.

Rusiä tatarları milli-mädäni möxtäriäte şurası utırışında milli-mädäni möxtäriät şurasınıñ yaña äğzalarınıñ wäqäläten tanu, räistäşlär saylaw, milli-mädäni möxtäriätlär turında federal' qanun qabul itelüneñ 10 yıllığı uñayınnan çaralar ütkärü, şuranıñ büläklären buldıru, iñ möhime — oyışmanıñ wäqäläten üsterü mäs’äläse tikşerelde. Moña qädär möxtäriät häm kongress bergä eşläsä, xäzer alarnıñ orğannarın ayırıp, möstäkıyl' oyışma itü mäs’äläse tikşerelde. Bu turıda Tatarstan xökümäte häm kongress citäkçelegenä möräcäğätlär yullanaçaq. Oyışmanıñ nizamnamäsen yazu buyınça komissiä tözeläçäk.

Rämil Bignov Rusiä milli-mädäni şurasına öçençe räistäş itep saylandı.

XS
SM
MD
LG