Accessibility links

дүшәмбе, 5 декабрь 2016, Казан вакыты 01:18

İran "Xämas" citäklägän fälästin idaräsenä 50 million dollar birä


Yäkşämbe könne İran xökümäte fälästin üzidaräsenä 50 million dollar aqça biräçägen belderde. Mäğlüm ki, anıñ citäkçelegenä radikal "Xämas" törkeme kilgäç, Quşma Ştatlar häm Yewropa fälästin xakimiatenä yardäm itüen tuqtatqan ide. Östäwenä, İzrail dä fälästin cirlärendä cıyılğan salımnarnı häm tamujnä keremnären radikallar utırğan idarägä küçermäyäçägen iğlan itte. Bu fälästin xakimiatendä finans krizis çığuğa kiterde. İran başqa illärne dä fälästin idaräsenä yardäm itärgä çaqıra.

İzrail, Quşma Ştatlar häm Yewropanıñ fälästin idaräsenä yardämne tuqtatu säbäbe bik ğadi - irekle saylawlar nigezendä bulsa da andağı citäkçelekkä radikal "Xämas" törkeme kilde, ä ul İzrailne tanımıy ğına tügel, aña qarşı qorallı köräş wä terror alıp barunı yaqlıy. Andıy şartlarda bezneñ aqçalar "Xämas"nıñ terror eşen finanslaw bulıp çığa, dip belderä Quşma Ştatlar häm Yewropa Berlege. Näticädä fälästin üzidaräse bügen aqçasız utıra häm bölgenlekkä töşü aldında tora. İran isä moña yul quymasqa buldı häm yäkşämbe könne anıñ tışqı eşlär ministrı Manuçer Mottaqi, Tähran fälästin üzidaräsenä 50 million dollar aqça küçerä, dip belderde:

Manuçer Mottaqi

Mottaqi bu xaqta, Tähranda uzğan häm fälästin xalqına yardäm itügä bağışlanğan xalıqara kiñäşmädä iğlan itte. Anıñ süzlärençä, bu aqça İrannıñ fälästinlelärgä dus millät bularaq büläge bulıp tora. "Xämas" wäkile Sami äbü Zuhri, fälästin yağınıñ moña bik räxmätle buluın belderä:

"İran üzeneñ fälästin xalqın yaqlawın belderde. Bez "Xämas"ta anıñ fälästinlelärgä aqçalata yardäm itüen bik yuğarı bäyälibez. Ğäräp wä möselman illäreneñ mondıy yaqlawı tabiği bulıp tora. Bu Könbatışnıñ fälästin xalqın bikläwenä dä tabiği cawap", di "Xämas" wäkile İrannıñ fälästin xakimiatenä aqça birüe turındağı belderüe uñayınnan.

Dubaydağı Farsı qultığı tikşerenü üzägennän Mostafa Alani, İrannıñ soñğı ğämäle şunı kürsätä ki, Könbatışnıñ "Xämas"nı dönyadan ayıru tırışlıqları töbäktä İran tä''sireneñ artuına ğına kiterä, dip isäpli:

"Näticä menä şul, sez "Xämas"nı iranlılar qulına ğına etäräsez. Häm beraz yıraq kiläçäkkä qarağanda, fälästin mäs''äläsendä bu bik qıybatqa töşäçäk. İranlılarnıñ xäzer "Xämas"qa üzençä tä''sire bulaçaq", di Yaqın Könçığış belgeçe.

İran tışqı eşlär ministrı fälästin xökümätenä yardäm itärgä bar islam dönyasın çaqıra. Ämma Alani, ğäräp illäre şığıy İrannıñ tä''sire artuına borçılıp qararğa tieş, bu alar öçen dä, Könbatış öçen dä yaxşı xäbär tügel, di.

Uzğan atnada fälästin üzidaräsenä aşığıç finans yardäm yullayaçağın Rusiä xökümäte dä iğlan itkän ide. Fälästin prezidentı Mäxmüt Ğabbas belän telefonnan söyläşkännän soñ bu xaqta tışqı eşlär ministrı Sergey Lavrov belderde. Ämma Mäskäw älegä fälästinlelärgä küpme aqça cibäräçägen äytmäde. Mart ayında Rusiä üzendä "Xämas" citäkçelären qabul itkän ide, şulay itep ul şuşı radikal törkemneñ xalıqara mäydanğa çığuına bulıştı. Rusiä dä üzeneñ Yaqın Könçığıştağı rolen arttırırğa omtıla.

Kärim Kamal
XS
SM
MD
LG