Accessibility links

чәршәмбе, 7 декабрь 2016, Казан вакыты 21:29

Sverdlovski ölkäseneñ Alapay şähärendä tatar mädäniäte uñay bäyä ala


Küptän tügel Sverdlovski ölkäseneñ Alapay şähäre kitapxanäsendä Musa Cälilneñ 100 yıllığına bağışlanğan kiçä bulıp uzdı. Kiçädä patriot-şağirneñ tormış häm icat yulı turında äñgämä-viktorina oyıştırıldı. Annan soñ “Çulpan” isemle balalar ansamble tatar konsertı quydı. Tıñlawçılar häm tamaşaçılar – Alapay şähäreneñ professional' litsey studentları.

Kitapxanä mödire Lyudmila Protopopova söyläwençä, professional' litsey kollektivı häm tatar ansamble belän kitapxanä inde 1995 yıldan birle eşli. “Kitapxanä häm xalıqlarnıñ ruxi üseşen torğızu” programmasın tormışqa aşıru qısalarında elek alar litseyda uquçılar belän çit il yazuçılar icatın öyränä torğan kiçälär oyıştıra torğan bulğannar. Annan soñ, yänäşädä yäşäwçe tatar xalqı mädäniäten öyränä başlağannar Monıñ säbäben Lyudmila Nikolayıvna Alapayda yäşäwçe tatarlarnıñ ruslar belän rättän töp xalıq bulıp yäşäwe dip añlata.

Xalıqlarnıñ ruxi üseşen torğızu programması buyınça tığız eşläwe näticäsendä, Alapay şähär kitapxanäse milli yañarış nominatsiäse buyınça ölkä mädäniät ministrlığı tarafınnan “Uñışqa yul” premiäse belän büläklängän. Kitapxanädä uzdırıla torğan milli çaralar qaysı da bulsa yazuçınıñ yä şağirneñ icatına bağışlana, şulay uq milli kuxnya serläre öyränelä. Litsey uquçıları tatar xalıq milli aşların peşerep alıp kilep kürgäzmä yasıylar, tege yäki bu rizıqnıñ äzerläw texnologiäse turında söylilär. Härber şundıy oçraşu şähär mädäniätınıñ yözek qaşı bulıp sanalğan “Çulpan” balalar ansamble çığışınnan başqa uzmıy. Bu yulı da balalar çığışın bik yaratıp qabul ittelär.

Ansambl'gä yörüçe balalar matur itep tatarça cırlap-biep kenä qalmıylar, alarnıñ tatarça söyläşergä öyränüenä zur iğtibar birelä. Qatnaş ğailädä tuğan cide yäşlek Ksyuşa Ryavkina – ansambl'neñ solistı. Ul biregä öç yäşennän birle yöri. Bu waqıt eçendä ul tatar süzlären döres itep äytä belergä öyrängän, beraz söyläşä dä belä. Undürt yäşlek Raina, başqa millättän bulğan iptäş qızlarıñ sineñ tatar kul'turası belän qızıqsınuıña niçek qarıy digän sorawğa, alar miña qızığalar, alarnıñ da yörise kilä dip cawap birde.

“Çulpan” balalar ansamble Sverdlovski ölkäse külämendä uzdırılğan festival'lärdä berniçä tapqır lawreat isemen aldı. Kollektivnıñ Alapayda ğına tügel, ölkä külämendä dä tanıluı ansambl'neñ citäkçese Naciä xanım Safiullina xezmäte näticäse.

Bez Naciä xanım belän äñgämä qorıp aldıq. Anıñ söyläwençä, baştaraq balalar tatarça cırlarğa häm biergä oyala torğan bulğannar. İñ möhime – sineñ mädäniäteñ başqalardan kim tügel, ber ük däräcädä buluın añlaw, di Naciä xanım. “Bez ber ük şähärdä yäşibez, ber şähärgä xezmät itäbez, ber ük xoquqlarğa iäbez. İñ berençe üz millätebezne, üz mädäniätıbıznı yaratırğa öyrändek. Tatar mädäni çaraların ğına oyıştırunı kötep tormıyça, çığışlarıbıznı barlıq şähär küläm çaralarğa täqdim itä başladıq. Niqädär kübräk täqdim itsäk, şulqädär yışraq uñay bäyä aldıq, - di ul, - Bügenge köndä “Çulpan” ansamble çığışlarığız Alapay şähärendä ber genä mädäni çara da uzmıy”.

Ansambl'gä yörergä teläwçelär arasında başqa millät balaları, bigräk tä ruslar küp ikän. “Bez bit tatar cırların cırlıybız, tatar iyüllären biibez. Yaxşılap uyladıñmı bezgä kilergä digän sorawğa ul balalar üzläreneñ tatar tamırların ezläp, menä minem şundıy-şundıy tuğanım tatar bulğan dip cawap birälär, annan soñ ansambl'gä bik teläp, tırışıp yörilär”, - dip söyli Naciä xanım.

Naciä Safiullina ansambl'gä yörüçe balalarnı Qazanğa alıp baru, professional' biyu ostaları konsertın kürsätep, alar belän tanıştıru turında xıyallana. Şulay uq kostyumnar tegäse ide, yuqsa, kostyumnarıbız bik ğadi, ämma böten närsä finanslarğa kilep terälä, di ul.

April axırında “Alapay bizäkläre” digän festival' bulıp uzaçaq. “Çulpan” ansamble festival'dä qatnaşu öçen yaña programma äzerlägän. Şähär mädäniät bülege xezmätkärläre ser itep kenä xäbär itkänçä, bu festival'dä “Çulpan” tatar balalar kollektivına “ürnäk ansambl'” iseme birergä cıyınalar. Rus şähärendä tatar mädäniäten şundıy yuğarılıqqa kütärgän kollektivqa kiläçäktä zur uñışlar ğına telise qala.

Fäwiä Safiullina,Yekaterinburg.

XS
SM
MD
LG