Accessibility links

Кайнар хәбәр

Qazanda yuğarı uqu yortlarında tatar telendä belem birü mäsäläläre qaraldı


Qazan däwlät arxitektura-tözeleş universitetında ütkän konferensiä Yuğarı hönäri belem birü sistemasında iketellelek: fännärne tatarça uqıtu dip ataldı. Älege fänni cıyılış universitetta tatarça uqıta başlawnıñ 15 yıllığına häm tatar telendä yuğarı texnik belem birüne oyıştıruçı professor Wäğiz Fätxullin istälegenä bağışlandı. Yuğarı uqu yortlarında tatar telendä uqıtunı nigezdä bik siräk oçrıy torğan milli canlı , fidaqär uqıtuçılar alıp baru säbäple, konferensiägä xalıq ällä ni küp kilmägän ide. Zalda böten respublikadan kilgän berniçä distä ğalim, belgeç kenä ide. Şuşı fänni cıyılışta qatnaşırğa çaqırılğan küp kenä citäkçelär dä konferensiä häm anda qarala torğan temağa bik açıq kürsättelär - alar monda bötenläy kilmägän idelär. Tatarstannıñ Fän häm mäğärif ministrı Finländiägä kitkäne, anıñ berençe urınbasarı Danil Mostafin häm Däwlät Şurasınıñ Mädäniät, fän, mäğärif häm milli mäs’älälär komitetı räise Räzil Wäliev prezidium utırışında qatnaşu säbäple cıyılışqa kilmäwe açıqlandı. Alarnıñ barısı öçen dä cawapnı respublika Ministrlar kabinetınıñ Tatarstan xalıqları mädäniäten häm tellären üsterü bülege başlığı Kim Miñnullinğa totarğa turı kilde. Xäyer, bu xaqta beraz soñraq.

Konferensiäneñ eşen qunaqlarnı sälämläwdän Qazan däwlät arxitektura-tözeleş universitetı rektorı Vladimir Kupriyanov başlap cibärde. Annarı üze häm kollegası öçen süzne deputat Tufan Miñnullin aldı. Milli belem birü probleması xaqında söylägändä, Tufan Miñnullin şundıy ber misal da kiterde. Deputatlar tatar teleneñ torışın tikşerergä dip ber balalar baqçasına barğannar. Anda balalar alarğa bik matur itep tatarça cırlap, biep kürsätkän. Läkin soñınnan açıqlanğan, älege balalarnı deputatlar kilgän töşkä kürşe balalar baqçasınnan alıp torğannar ikän. Milli mäs’älälärdä menä şundıy küz buyawlıqqa qarşı torırğa kiräk, dide deputat. Häm milli mäğärifneñ başqa problemaları xaqında da söyläde.

Annarı süzne Kim Miñnullinğa birdelär. Ul milli mäğärif ölkäsendä xökümät şaqtıy ğına eşläsä dä, xäl iteläse mäs’älälärneñ küplegen äytte, finans yärdämneñ dä az buluın tanıdı. Ä üzeneñ çığışınnan soñ, inde äytelgänçä, aña nigä tatar mäktäpläre açılmaw, açılğannarı da yabıla baruı, xätta nigä Tatarstanda törle sport komandalarına yoldızlar satıp alu öçen aqçalar milli mäğärifkä qarağanda bik küp märtäbälärgä artığraq totıtuı turında sorawlar yawdırdılar. Bu sorawlar, älbättä inde, cawapsız qaldı.

Annarı respublikanıñ törle yuğarı uqu yortlarında tatar telendä belem birüçelär çiratı citte. Alar üzläreneñ täcribäläre belän urtaqlaştı, problemaları xaqında zarlandı, alarnı çişü yulları xaqında uylandı. Älege yullarnıñ berse – berläşü kiräklege äytelde.

Gölnaz İlgizär

XS
SM
MD
LG