Accessibility links

шимбә, 10 декабрь 2016, Казан вакыты 00:11

İnvestorlarnı awıl xalqı qabul itärme?


Tatarstanda, aldağı 3-4 yıl eçendä 13 duñğız ferması tözergä cıyınalar. Monna tış, 50gä yaqın söt fermaları da bulaçaq. Äle tağın berniçä qoş fabrikaları, ere terlek fermaları da tözeläçäk. Barlığı 130 tör ferma qalqıp çığaçaq yäki tözekländereläçäk. Bu xaqta, Tatarstannıñ awıl xucalığı häm azıq-tölek ministrı Marat Äxmätov xäbär itte. Däwlät tözemi bolarnı. Tatarstan premyerı Röstäm Minnixanov, ğomumän, däwlät awıl xucalığına kredit fälän birügä dä qarşı. Çäçelmiçä qalğan cirlär bälki yaxşıraqtırda äle dip belderde ul. Ä tege fermalarnı investorlar tözi. İnvestor süze, awıl xalqınıñ soñğı yıllarda şatlığı da, qara qayğısı da buldı. Awılğa, Tatarstannıñ ere bankları, yä bulmasa başqa tör şirkätläre kilde. Xalıqtan cirne alıp, ere fermalar da tözedelär, cirlärendä igen dä üsterdelär. Läkin matbuğat, haman sayın, investorlarnıñ naçar yaqların da tabıp tordı. Küp cirlärdä, xalıqqa cir öçen berni tülänmäde, yä bulmasa, çittän qaytarılğan 70 meñ sumlıq sıyırlar nindider bilgesez ülät belän qorılıp bara häm mondıy misalların küpläp kiterergä bula. Läkin, uñışlı eşlägännäre dä bar. Şulay itep, bu investorlarnıñ da törlese bar. “Azatlıq”nıñ açıq mikrofonı başqalada awıl xalqın tabıp xäl-ähwällären belü öçen Qazannıñ Çexov bazarına häm Üzäk bazarğa yul tottı. Ni qızğanıç, awıl-rayonnan it-söt, yäşelçä satırğa kilgän abzıy-apalar kübese mikrofon kürügä yözen qaplıy, qaçalar. Äyterseñ alarnı televizorğa töşerälär, mikrofonnan uttan qurkqan kebek qurqalar. Awıl xalqın söyläşterü öçen alar belän 5 minut bolay ğına söyläşep torırğa turı kilde. Abzıy-apalarnı söyläşterep mikrofonğa äzerlär dip uylağanda da berniçäse genä açıq mikrofonğa fikerlären belgertergä buldılar. Bez alarğa “Awılğa investorlar kiräkme?” – digän soraw birdek. Yäşelçä, tozlı käbestä satuçı awıl apası üz rayonında xucalarnıñ kümäk xucalıqlarnı taratıp, binaların, texnikalarnı satıp taratuları turında söyläde. Awıl xalqınıñ eşlärgä Qazanğa kitep betüen dä äytte. Üze dä bik küp yıllar fermada sıyır sawışu bulıp eşlägän bulğan, xäzer menä bazarda satu itärgä duçar itelgän. Ölkän yäştäge rayon abzıyı investorlar kiräklegen citkerde. Kolxozlar bulğanda da eş xaqı, yünle tormış bulmadı, bälki bolarınnan xalıqqa beraz ciñellek kiler dip ömetlänä. Apastan Qazanğa tovar alırğa kilgän urta yäşlärdäge abzıy üzläreneñ rayonına investorlarnıñ qulı älegä timäwen äytte. Ägär kilä qalsalar, xalıqnı aqçalı eş belän tä'min itsennär ide di. Ber awıl apası äytkänçä, cirne alıp, bulğan fermalarnı cimerep, xalıqnı aç totarğa mäcbür itmäsennär. Röstäm İsxaqi, Räfis Cämdixan

XS
SM
MD
LG