Accessibility links

Darina yärdämgä moxtac!


Qazannıñ 6nçı sanlı xastaxanäsendä Darina isemle bik yäş häm matur qız bala yata. Başqa awırular yanına tuğannarı kilep torsa, bu qız härwaqıtta da ber üze. Milli xäräkät wäkile, Nurulla mäçeteneñ mäxällä äğzäse Äminä xanım Kärimova Darina xaqında işetkäç tä, anıñ yanına barıp yöri başlağan. Qıznıñ ber ayağı yuq. Ä iñ ayanıçı - ul yätim bala. Bu qıznıñ ütä dä qatlawlı yazmışı turında Äminä xanım söyli:

Darinanı änise balalar tudıru yortında qaldırıp kitkän. Ämma ul balalar yortında yäşämäde. Anıñ babası üzenä yäşärgä alğan. Häm aña Darina dip isem quşqan. Allah aña bu qıznı büläk itkän, dip qabul itkän anı. Läkin ber yıldan soñ babası wafat bula. Qız äbise belän genä qala. Darina aqıllı qız bala bulıp citeşä. Yış awıruçı äbiseneñ yärdämçese bula.

Faciğä 2001 yılnıñ noyäberendä bulğan. Darina ul waqıtta üz äbise yanında Tatarstannıñ Çüpräle rayonı İske Çüpräle awılında yäşäp, 10 sıynıfta uqı ide. Sıynıftaşları aşxanägä aşıqqanda, kemder bu qıznı yalğış etep cibärgän häm Darina öçençe qattan ikençesenä qädär mätälep kilep töşkän. Şunda anıñ uñ ayağı imgänep qalğan. Rayon şifaxanäse tabipları qıznıñ ayağın tikşergännän soñ, qurqınıç närsä yuq dip beldergännär. Läkin ike atnadan soñ Darina yöri almıy başlağan. Anıñ ayağı zäñgärlängän. Qıznı bik küp şifaxanälärdä däwalıylar. Bügen Darinağa 20 yäş. Ul inde biş yıl buyı urınnan tormıy. Şul waqıt eçendä bik küp operatsiälär kiçergän ul - anıñ ayağın kiskäli barğannar. Şifaxanädä yapa-yalğız yatıp, qız töşenkelekkä dä birelgänder. Läkin anıñ maqsatçan, omtıluçan buluı soqlandıra. Ul Qazan Texnik universitetınıñ sotsial'-iqtisad bülegenä uqırğa kerä. İmtixannarın şifaxanädä tapşırıp bara.

Darinanıñ iñ zur xıyalı - ayaqqa basu. Ämma anıñ öçen tözälergä kiräk, çönki qıznıñ immunitetı şaqtıy qaqşağan. Aña yaxşı tuqlanırğa häm sanatoriyda reabilitatsiä ütü mäcbüri. Protez alu da bik möhim. Tabiplar çit il protezı kiräklegen äyttelär, çönki başqalar aña turı kilmi. Ä proteznı yasatu bik qimmät tora. Qız invalidlıq buyınça 1400 sum aqça ala. Anıñ qart äbise dä keçkenä pensiägä yäşi. Protez yasatu öçen isä 300 meñ sum aqça kiräk bulaçaq. Darina bügen yärdämgä bik tä moxtac. “Azatlıq” radiosı aşa milli xäräkät wäkile, Nurulla mäçeteneñ mäxällä äğzäse Äminä xanım bu qızğa yärdäm itärgä mömkinlege häm teläge bulğan här keşegä möräcäğät itä:

Mömkinlegegez bulsa zinhar qızğa yärdäm itegez! Möselmanmı, tügelme mondıy keşelärgä yärdäm itü bik sawaplı eş!

16 yäşendä ayaqsız qalğan Darinağa yärdäm qulın suzarğa teläwçelär Nurulla mäçetenä möräcäğät itä ala. “Tatarstan” bankında Fäxretdinova Darina isemenä xisap ta açılğan.

OSB “Bank Tatarstana” №8610 QAZAN şähäre

R/sç.30301810962000606219

K/sç.30301810600000000603

БИК049205603

Al'bina Zäynulla, Qazan

XS
SM
MD
LG